Shillong, Jymmang 19:
Ka Reserve Bank of India (RBI) ha ka Sngi Thohdieng ka la pynmih ïa ka jingpynbna ban pynduh noh ïa ka lut T. 2,000 ïa kaba la sdang ban pynmih paidbah ha u Naiwieng 2016.
Khnang ban ym pynthut ïa ki kam bad ban kiar ïa ka jingkulmar ha ki kam jong ki Bank, ka jingkylliang ïa ki lut T. 2,000 sha kiwei kiwei ki lut tyngka kan don pud haduh T 20,000 ha kano kano ka por ha kano kano ka Bank naduh ka 23 tarik Jymmang, 2023 haduh ka 30 tarik Nailur, 2023.
Lah ban kdew ba ïa ka lut T. 2,000 la pynmih nyngkong eh ha u Naiwieng 2016 ban pynbiang ïa ka jingdonkam pisa hadien ba la weng noh ïa ka lut T. 500 bad T. 1,000 kiba dang ïaid ha kato ka por. Ka jingsangeh ban shon ïa ki lut T. 2,000 ka la long naduh u snem 2018-19, la ong ka RBI.
Ka la ong ruh ba kumba 89% jong ki lut T. 2,000 ki dei kiba la pyllait shwa u Lber 2017, bad ka jingdon jong kane ka lut ka la hiar na ka T. 6.73 lak klur ha ka 31 tarik Lber, 2018 sha ka T. 3.62 lak klur ha ka 31 tarik Lber, 2023. Ka RBI ka la ong ruh ba la ïohi ba bun ki bym pyndonkam shuh ïa ka lut T. 2,000 ha ka siew ka tda. Ka la pynshai ruh ba ka jingdon jong kiwei ki lut tyngka ka long kaba dap ïa ka jingdonkam pisa ki paidbah.
Lah ban kdew biang ba ki paidbah ki lah ban leit thep ïa ki lut T. 2,000 ha ki ‘Bank Account’ jong ki lane ban ïa kylliang ïa kine ki lut bad ban ïoh noh da kiwei na kano kano ka Bank naduh ka 23 tarik Jymmang, 2023.
Ha kajuh ka por, ka RBI ka la ai jingmut ïa ki Bank ba kin sangeh noh ïa ka jingpyndonkam ïa ka lut T. 2,000 mynta.
