Shillong, Jymmang 19:
Ka Niaw Wasa United kaba long ruh ka lahduh ha ka lympung sdang jong ka Meghalaya State League (MSL) ha u snem 2017-18, ka la mad ïa ka nam rem ha ka jingïakhun pyrshah ïa ka Mulait United kaba la long ha Kiang Nangbah Stadium, Jowai ha ka sngi Thohdieng.
Haba phai sha kane ka jingïalehkai jong ka Group-B, ka Niaw Wasa United ka la shah pynliem noh da 1-0 kol ha Mulait United kaba na Saipung Area Sports Association. Ïa kane ka kol la ïoh ban thep da u Ker Syrti ha ka minit kaba 69 kaba la biang pura ïa ka Mulait United ban khur ïa ki 3 point pura.
Haba phai pat sha ka jingïalehkai jong ka Group-A ha Shillong, na ka liang ki bor pynïaid ki la pynkylla noh ïa ka prokram ïalehkai bad la pynlong noh da ka jingïakhun hapdeng ka Seng Samla Laitryngew pyrshah ïa ka Umkseh bad ïa ka jingïakhun hapdeng ka Mawlai Sports Club pyrshah ïa ka Langsning Football Club la rah noh sha ka sngi Saitjaiñ.
Haba phai sha kane ka jingïakhun, ka la pynshongshit ïa ki nongwan peitkai ha kaba ka Laitryngew na ka tyrsim jong ka jingshah rem, ka la lah ban pynïakhaid noh ha ka jingïakhun pyrshah ïa ka Umkseh da mar 3 kol.
Mar ïasdang ka jingïalehkai, ki rangïaleh-kai ka Umkseh ki la ïakhun tyngeh bad lyngba u Dibastar Rani la ïoh ban khyrwit ar kol kata ha ka minit ba 16 bad 30. Nalor ka jingshah thep ar kol lypa, ka Laitryngew ka la duh noh uwei u rangïalehkai, kata u Banraplang Buhsan uba la shah beh noh na madan hadien ka jingïoh ‘red card’.
Hynrei haba bteng ïa ka kylla miet, ka Laitryngew ka la ïoh mynsiem hadien ba ka la ïoh ban pynphai ar kol, kata nyngkong la khyrwit da u Banlambok Buhsan ha ka minit ba 53 bad kaba ar la khyrwit da u Iaraplang Buhsan ha ka minit ba 56.
Hadien ka jingïoh pynphai ar tylli ki kol, ka Laitryngew lyngba u Johnplayson Lyngdoh ka la ïoh ïa ka kol kaba lai ha ka minit ba 64 hynrei kim shym la lah pat ban ïada ïa la ka kol bad dei ha ka minit ba 85 ba u Rangdajied Rynjah u la ïoh ban pynphai.
Haba phai pat sha ka jingïalehkai jong ka Group-D ha Tura hapdeng ki ar tylli ki kynhun kiba ïakhun ban khur ïa ka jingjop kaba nyngkong eh ha ka lympung MSL bad hangne ka la dei ka Wasa FC kaba la jop da 2-0 kol pyrshah ïa ka Atong Matgrik. Ïa kine ki ar tylli ki kol la thep da u Kouchi Rabha ha ka minit ba 36 bad u S Sangma ha ka minit ba 82 ha ka jingïalehkai ba la long ha madan Chandmari.
Katba ha ka jingïakhun jong ka Group-C ha Maw-kyrwat, hapdeng ka Riangdo YSCA pyrshah ïa ka Seven United kaba la long ha ka madan MDSA, ka Seven United ka la khur jingjop da 1-0 kol.
Ki jingïalehkai ban long lashai ka sngi ka 20 tarik pat, kata ha ka Group A ha Shillong, ka Mawlai kan ïakhun pyrshah ïa ka Langsning ha ka por 3 baje janmiet. Ha ka Group B ha Jowai, ka Ladthadlaboh kan ïakhun pyrshah ïa ka Rymbai Iawpynsing ha ka por 2:30 janmiet.
Ka jingïalehkai ha ka Group C ha Mawkyrwat pat kan long hapdeng ka Pyndengrei Sports Club pyrshah ïa ka Lumdiengngan Sports Club ha ka por 3 baje janmiet bad ha ka Group D ha Tura pat ka jingïakhun kan long hapdeng ka Chipakkore SC pyrshah ïa ka Khliehmawlieh SC ha ka por 3 baje janmiet.
