Gangtok, Jymmang:
Ki bor pulit jong ka jylla Sikkim ki la pyntip ba haduh 26 ngut ki briew, kynthup ïa 23 ngut ki khynnah skul ki la ïoh ïa ki jingmynsaw na ka jingjiakylla bus kaba la jia ha ka thaiñ East Sikkim District ha ka 18 tarik mynta u bnai.
Ki bor pulit ki la pyntip ba katei ka jingjia kylla bus ka la jia ha ka shnong Singbel, East Sikkim district – ka shnong kaba jngai kumba 40 km na ka nongbah Gangtok.
Ki bor pulit ki la pyntip shuh shuh ba napdeng ki 26 ngut kiba la ïoh ïa ki jingmynsaw, 23 ngut ki dei ki khynnah skul, uwei u nongñiah bus bad 2 ngut ki nonghikai. Ïa kitei kiba la ïoh ïa ki jingmynsaw na katei ka jingjia la leit ban pynkit noh sha STNM Multispecialty Hospital bad Central Referral Hospital, Gangtok na ka bynta ki lad jingsumar kiba janai. Kiwei pat kiba ïoh ïa ki jingmynsaw kiba malu mala la leit ban pynkit bad sumar ha Singtam hospital.
Tad haduh ba la ïoh ïa kane ka khubor la ïathuh ba ym shym la don satia kino kino kiba la khlad na katei ka jingjia.
Kat kum ki jingïoh lum jingtip la ïathuh ba ki khynnah skul kiba la ïoh ïa ki jingmynsaw ki dei ki khynnah rit kiba pule ha kawei ka skul jong ki khynnah kaba don ha ka shnong Makha.
