Shillong, Jymmang 19:
Ka synjuk ki nongñiah kali kamai ba la tip kum ka East Khasi Hills Local Taxi Welfare Association ha ka Sngi Thohdieng ka la pynbna ba kan khynra ïa ki laisen khaïi lane Trading Licence jong ki bar jylla kiba kamai taksi.
Kane ka jingpynbna ka la wan hadien ba arngut ki samla Khasi ki la shah shoh ha ki bar jylla ha Khyndailad ha ka miet Sngi Palei. Ïa ki san ngut kiba la shah kynnoh donkti ha kane ka jingshoh, la kem noh da ki pulit ka East Khasi Hills na Guwahati, Assam ha ka Sngi Thohdieng.
Ha kane ka sngi, ka la don ruh ka jingpynsangeh kamai ïa ki taksi ha sor Shillong ha kaba ki nongñiah ki khlem shah ïa ki kali kamai ban kit briew kum na Motphran. Ka jingdawa ka long ba ki pulit ki dei ban pynshisha ïa ka jingkem ïa kitei ki san ngut ki briew.
Katba ha janmiet jong katei kajuh ka sngi, ki nongïalam katei ka kynhun ki la leit ïakynduh ïa ki heh pulit ka distrik bad ki la pynpaw ha ka jingïakynduh ha Khyndailad sha ki para nongñiah kali ba ki pulit ki la dep kem ïa kitei ki san ngut bad ba ki la ïohi ruh ïa ki dur jong ki.
Ha kane ka jingïakynduh, la pynbna ruh ba naduh ka Lah Sngi U Blei, kata, ka 23 tarik Jymmang, ka synjuk kan sa khynra ïa ki laisen khaïi jong ki bar jylla kiba kamai taksi ha Shillong.
