Shillong, Jymmang 19:
Ka Madan Kyndong kaba don hadien jong ka Nabon College, Mission shen kan sa kylla dur noh bad kaba lah ban pyndonkam ban pynlong ruh ïa ki jingialehkai bapher bapher ynda la dep ban tei ïa ka Sports Complex.
Kane ka la long hadien ba ka la don ka jinghiar jurip ïa kane ka madan da ki dkhot jong ka JJM Nichol’s Roy Memorial Committee hapoh ka jinglam khmat u Bah Ransom Sutnga kum u Chairman kane ka committee.
Kane ka madan kaba la don naduh u snem 1969 ka dei kaba la shu ieh shrah kumto mynta da ki phew phew snem khlem da lah ban pyndonkam eiei bad ka la long ruh ka jingduhnong kaba khraw ym tang ïa ka committee hynrei wat ïa ki samla kiba ju smat ban ïalehkai. Hynrei lyngba ka jingshimkhia u Chairman ba thymmai, ha ka sngi Thohdieng ki la pynlong ka jinghiar jurip ïa kane ka madan, kata hadien ba ki la ïoh ka song jingïarap na ka CM Special Development Fund kaba long T.10 lak ban pynbit pynbiang bad pynbha ïa kane ka madan.
La ïathuh ba ka jingheh jong kane ka madan kumba ka don mynta ka long haduh kumba 52 hajar square feet eiei bad na ka liang ki nongïalam ka Committee ki la pyntip ba shen tang ailad ka bneng yn sdang noh ïa ka kam ban pynbha ïa kane ka madan, khamtam lei hadien ba na ka liang ka committee ka la dep ban ïoh ka installment ba nyngkong kaba long T.5 lak na ka skhim u Myntri Rangbah ka jylla u Conrad K Sangma.
Haba kren sha ki lad pathai khubor hadien ba la dep ban jurip, u Bah Ransom Sutnga u la ong, ïa kane ka madan ka dei kaba la ai da ka sorkar sha ka committee ha u snem 1969 por ba dang long Chairman i Prof GG Swell.
“Hadien ba shimti thymmai, ngi shem ba kane madan la shu iehkumto, bad sngew ba donkam ban pynbha noh, ban long jingmyntoi na ka bynta kiba bun balang, khamtam ki khynnah samla,” la ong u Bah Ransom bad kmen ba ïoh ka jingïarap na u Myntri Rangbah.
“Ngi la dep ban pynkhreh ka DPR na ka bynta ban pynkylla dur, namar ngi don ka jingthmu ban don ka sports complex bad ka madan kaba bha,” u la ong bad pyntip ba tang ailad ka suiñ bneng, ha ka taïew ban wan yn sa lah ban sdang noh ïa ka kam.
Kumba ka long mynta, watla shu ieh shrah ïa kane ka madan, hynrei na ka liang jong kane ka committee ban ïada na ka jingshah pyndonkam bakla ne kylla jaka leh kam sniew, ka la dep ban ker kynroh ïa ki sawdong jong kane ka madan.
