Doha, Jymmang:
U heh saipan jong ka ri Qatar u Sheikh Jassim bin Hamad Al Thani mynta ka kynti u lah pynlong ruh ia ka jingiai pynjanai shuh shuh ka jong u ha kaba iadei bad ka jing-iathong na ka bynta ban pyllait noh ia ka klob ialehkai phutbol na London ka Manchester United na ki kti jong ka ‘Glazer Family’ kaba dang iai long ka trai jong ka klob haduh mynta.
Kumta kumba ka paw ka long ba u Sheikh Jassim u don mynta ha ka jingialeh ka jong u ha ka jingiathong bad kiwei pat ki heh spah ka ri Bilat kum u Jim Ratcliffe hadien ba kitei arngut ki lah paw mynta kum ki nong-iakhun kiba ha khmat eh na ka bynta ka jingiaknieh thied-duh ka jong ki ia katei ka klob ialehkai ba pawnam bha ha ka lympung EPL. Shuh shuh ruh, u Ratcliffe haduh mynta u paw kum uba hakhmat eh ha ka jing-iakhun ha ka por ba ka kylla balai jong ka jingiathong lah khang noh ha u bnai ba lah dep.
Kumta u Ratcliffe uba ju iai kyrshan ia ka klob baroh kawei naduh ba u dang khynnah, u pynbna ba u lah thong mynta da ka jingsiew kaba heh tam na ka bynta ka klob ha kaba u dang iai wad ruh ki lad ki lynti ban ioh bun ki nongiasambynta hapdeng jong u bad kiwei pat.
Kumta ruh ka jing-iathong baheh ka jong u ka lah ruh ban ailad na ka bynta u Executive Co-Chairmen jong ka klob u Avram bad Joel Glazer ba kin iai sah kum ki nongpynlut ha ka klob baroh kawei kaba long ruh ka sienjam ka bym shym da paw than hakhmat ki nongkyrshan jong ka klob.
Kumba ka paw shai mynta ka long ba ka jingiathong jong u Sheikh Jassim kaba long da 100% ka jingteh lakam ka jong u mynta na ka bynta ka klob bad ka jingkular ruh ia ka jingrat dienkhong noh ia ka ram ba ka klob ka lah kit haduh mynta kaba lah poi sha ka £970 million ($1.2 billion). Ki khubor ki iathuh ruh ba ka “Glazer’s Family” ka bym shym la lah shuh ban jop pyrshah ia ki nongkyrshan jong ka klob na kylleng ka pyrthei naduh ba katei ka kynhun ka shah teh shah khum ha ka ram kaba £790 million naduh ba lah shimti ia ka kynhun baroh kawei ha u snem 2005, ka paw mynta ia ka jinglong ba la khreh na ka bynta ban theh bun pisa ha ka jingiohnong kaba bun ha ka por ba kan pynlong ia ka sien kaba nyngkong ia ka jingpynlut jong ka Shabar ha u bnai Naiwieng.
Kumba long mynta katei ka trai jong ka klob ka dang iai bat halade na ka bynta ka rekod ha ka pyrthei kaba da £6 billion ka jingsiew na ka bynta ka klob baroh kawei ha shuwa ba kan mynjur bad pdiang na ka bynta ban die noh ia ka klob.
Ka Manchester United Supporters’ Trust (MUST) ka khot ka wer mynta na ka bynta ka jingpynsted ha ka ban poi noh sha kaba kut ia ka jingpyntyllun ia ka kam na ka bynta ban ailad ia ki trai ba thymmai jong ka klob ba kin pyniaid ia ka kynhun baroh kawei na ka bynta ka iew iadie-iathied jong ka aiom lyiur kaba mynta. Katei ka klob kumba ka paw haduh mynta ka long ba kam shym la lah shuh ban rah ia ka thong jingjop na ka lympung EPL naduh ba lah shongthait noh u nongpyniaid barim jong ka kynhun u Alex Ferguson ha ki snem ba lah leit noh.
Hynrei ka long pat ka kynhun kaba la lah pat ban pynkut noh ia ka jingduh jong ka ban rah ia ka trophy jingjop ba ka lah ap-rmang lah hynriew snem, da ka jingialehkai bha ka jog ka ha ka aiom ialehkai ba mynta, ha kaba ka tei ka kynhun ka lah khur shalade ia ka jingjop ha ka League Cup hapoh ka jingpyniaid u Erik ten Hag kum u nongpyniaid ba mynta jong ka klob.
