Shillong, Jymmang 19:
Ka seng Hynñiewtrep National Liberation Council (HNLC) ha ka Sngi Thohdieng ka la ong ba ka kyrmen ïa kaba bha tam na ka jingïakren ïasuk bad ka sorkar, hynrei ka seng kam lah ban pyntikna ba haduh katno kane ka jingïakren ka lah ban ïaid jngai lane kan long kaba jop.
Ha u kyrwoh khubor, u General Secretary & Publicity Secretary ka HNLC, u Bah Saiñkupar Nongtraw, u la ong ba hadien ba ki nongïalam ka HNLC ki la ïakynduh ïa u Symbud Myntri Rangbah, Bah Prestone Tynsong, ka la don ka jingïapynbeit ba ïa ka jingïakren ïasuk bapura yn sdang naduh u bnai Jylliew kumba la paw ha ki lad pathai khubor.
Na ka liang ka HNLC, u Bah Nongtraw u la ong, ka kwah ban pynshai paidbah ba ka jingwan jong ka seng shakhmat ban ïakren ïasuk bad ka sorkar kam dei ka jingpyndem wait, hynrei ka dei ka jingangnud ban ïakren sngewthuh jingmut bad ban ïa pynbeit halor ki jingeh ka saiñ hima sima jong ka jaitbynriew Hynñiewtrep.
Kam shym don kano kano ka jingïoh jingmyntoi shimet, u la ong, hynrei ka dei na bynta ka jingïohnong jong ka jaitbynriew hi baroh kawei. Ki dkhot ka HNLC lei ki la duh lypa ïa ki kmie ki kpa, ki hynmen ki para, ki lok ki khun bad ki la duh lypa ym tang ka ïing ka sem wat ïa la ka jong ka jingim hi ruh, la ong u Bah Nongtraw.
“Ka jaitbynriew jong ngi ruh ka don ïa la ka jong ka khana pateng ha ka saiñ hima sima. Ka jingangnud bad ka thong jong ka HNLC kam dei ïa ka ‘separation’ lymne ïa kata ka ‘integration’, hynrei ngi ïeng skhem ban ïoh ïa ka ‘recognition’ ne kata ka jingithuh kum ka jaitbynriew kam pher da ka long hapoh ne shabar jong ka ri India. Ngi donkam ïa la ka jong ka ïing kaba skhem kaba ngi lah ban kam ba ka dei ka ïing ba shisha jong ngi kumba long ki Mizo, kiba don ïa ka Mizoram,” la ong u Bah Nongtraw.
Shuh shuh u la ong ba ka sorkar ka donkam ban weng ïa ki jingeh naduh tynrai bad donkam ïa ka khyndew la ka jong namar ka khyndew ka dei ka tynrai jong ka jingim.
“Haba ngi don ïa la ka jong ka khyndew, ngi lah ban shna la ka jong ka sorkar bad ïeng ïalade kum ka jaitbynriew kaba laitluid. Halor ka khyndew ka shyiap lajong ngi lah ban seng ïa ki karkhana, ki kam ki jam, ngin bat hi ïa ka ïoh ka kot bad ka synshar khadar halade, hynrei lada ngim don tang shi lyngkhot ka khyndew ka mut ngim don eiei. Ngi lah ban pyndonkam ïa ki mar poh khyndew, ki khlaw ki btap, ki um ki wah na bynta ba ngin im ïalade. Haba ngi don la ka jong ka khyndew ka shyiap ngi lah ban rep ban riang ban bsa ïalade bad ban leh hi nalade,” u la ong.
Da kaba leh kumne, u la ong kum ka jaitbynriew kan lah ban weng ïa ki jingeh lajong ha ka jaka ban ap ïa ka Sorkar India ba kan weng ïa ki jingeh.
“Ki paid Garo ruh ki hap ban sngewthuh bha ïa kane ka bynta bad ma ki ruh ki donkam noh jar la ka jong ka khyndew bad ka ïing. Ngim kwah ba ki A’chik bad ki Hynñiewtrep kin kylla long sa kiwei pat ki jaitbynriew Kuki ne ki Rohingya lymne kum ki Kurds ki bym don la ka jong ka khyndew lymne ki bym don la ka jong ka ri, hynrei ki dei ki jaitbynriew kiba shu bun tang u paid bad kiba hap ban shu phetwir pat ïalade kylleng kylleng,” la bynrap u Bah Nongtraw.
Haba pynpaw ïa ka jingkyrmen ba ka HNLC ka don na ka bynta kaba bha tam na ka jingïakren ïasuk, ha kajuh ka por, u Bah Nongtraw u la ong ba kam lah pat ban pyntikna ba haduh katno kane ka jingïakren ka lah ban ïaid jngai lane kan long kaba jop namar kat haduh mynta mynne ka jingïakren ïasuk kaba jop ka dei tang ka Mizo Peace Accord 198. Lada kheiñ ha ka pyrthei baroh kawei ne ha ka histori jong ka ri India lait nangta kiwei kiwei ki jingïateh soskular ki seng kieng atiar bad ka Sorkar India kim poi shano shano bad ki shu kut tang ha ki jingthoh bad ki jingkular jong ka Sorkar.
