Shillong, Jymmang 19:
U Superintendent of Police (SP) ka East Khasi Hills, u Bah Sylvester Nongtnger ha ka Sngi Thohdieng u la pyntip ba ha kaba ïadei bad ka jingshah shoh jong arngut ki samla ha ka miet jong ka Sngi Palei ha Khyndailad, ki pulit ka Special Cell ka East Khasi Hills da ka jingïarap ki pulit ka nongbah Guwahati, ki la ïoh kem ïa san ngut ki briew na Guwahati, Assam.
Ïa kane, u Bah Nongtnger u la pynbna lyngba u kyrwoh khubor bad u la phah ruh bad ka dur jong kiba shah kem. Hynrei ym shym la pynpaw pat ïa ka kyrteng, jaka sah lane ïa ki dur khmat jong kita ki san ngut kiba la shah kem.
U Bah Nongtnger u la ong ha hynnin ka miet ha ka por 10:20, u Ïohborlang Lyngdoh, 27 snem ka rta, na ka shnong Jongksha, bad u Banshai Syiem, 25 snem ka rta na Laitkor, ki la shah shoh ha shi kynhun ki runar bad kine ki samla ki la mynsaw bad la ïalam ïa ki sha Civil Hospital, Shillong ban ïoh jingsumar.
Nangta, u SP u la ong ruh ba ki pulit ki la pynrung da ka jingujor ha thanat Sadar bad ka jingtohkit ka la ïaid. Dei ha ka jingtohkit ba ki pulit ki la ithuh ïa kita ki san ngut ki briew bad la leit kem noh ïa ki na Guwahati.
