Shimla, Jymmang:
Kum shi bynta ban nang iai pynshlur bad ai mynsiem shuh shuh ia ki briew kiba ju ieid ha ka kam ialehkai ka jong ki bad kumjuh ruh kum ki nongialehkai kiba ju sngewtynnad ban ialehkai ha ki jait jingialehkai bapher bapher kiba na ka thain Himachal Pradesh, ka khubor ka iathuh ba ka sorkar jong ka jylla Himachal Pradesh ka pynkhreh mynta ban pynlong ia ka lympung ialehkai Olympic jong ki shnong nongkyndong ia kaba lah tip kum ka ‘Rural Olympics’, ia kaba yn sa sakhi ruh ia ka jingshimbynta haduh 40,000 ngut ki khynnah samla kynthup ia ki 20,000 ngut ki kynthei.
Kumta katei ka lympung ialehkai, na ka liang jong katei ka sorkar ka iathuh ba la pynkhreh ban pynlong ha u bnai Nailur, bad ba katei ka lympung kan iai pynlut shibun ki kam jong ka ha kaba iadei bad ki jingialehkai ka riti-dustur katei ka jylla. Shuh shuh ruh yn sa shna ruh ia ka kpait-sain-kam (Policy) na ka bynta ban pyntreikam ia ki jingialehkai ba shongshit bad sngewtynnad kum ka River Rafting bad Paragliding kiba long ki jingialehkai kiba lah wanrah ia ka jingjia ba sngewsih ha ki snem ba lah leit noh namar ka jingbym shym la don kata ka kpait-sain-kam ha ki jingialehkai. Kumta, ia kata ka Kpait-sain-kam ia kaba yn sa shna yn sa rai khatduh katkum ka National Sports Policy & Lodha Committee Guidelines, ia kaba yn sa pynthikna ruh ia ka jingkhuid jingsuba bad ka jingiaid beit ki kam ki jam ha ki shnat treikam bad ka jinglumlang jong baroh ki jingialehkai ha ki lai kyrdan ialehkai.
