Shillong, Jymmang 19:
Ka skul Mawlai Presbyterian ka la ïoh rah ïa ka nam lahduh jong ka lympung Inter-School Invitational Futsal (Boys) Competition ba la pynlong da ka Seng Khasi College kum shi bynta jong ka jing-rakhe ïa u mawmer jong ka jingdap sanphew snem.
Ha kane ka lympung kaba la long ha ka 18 bad 19 tarik mynta u bnai, ki la don haduh phra tylli ki skul kiba la wan ban ïashim bynta kiba kynthup ïa ka Christian Academy Higher Secondary School, ka Pearly Dew Higher Scondary School, St. Dominic’s Higher Secondary School, Mawlai Presbyterian Higher Secondary School, Seng Khasi Higher Secondary School, Sacred Heart Boys Higher Secondary School, Government Boys Higher Secondary School bad ka Seng Khasi College (Higher Secondary Section).
Ïa ka jingïalehkai la wan ban pynïaid da ki dkhot jong ka Futsal Dream Team. Ki ar tylli ki skul kiba la ïoh ban rung sha ka final ki long ka Mawlai Presbyterian Higher Secondary School bad ka Seng Khasi College (Higher Secondary Section). Ka Mawlai Presbyterian Higher Secondary School ka la ïoh ban rah ïa ka nam lahduh hadien ba jop ïa ka jingïakhun da 4-2 kol.
Ïa ka khusnam sha ki lahduh la sam da u Rangbah RH Dkhar uba long u Secretary jong ka Governing Body jong ka college bad ha kajuh ka por kum u kongsan jong kane ka lympung ïalehkai.
