Shillong, Jymmang 19:
Ka kynhun ïalehkai jong ka Mawlum Tyrsad ka la ïoh rah ïa ka nam lahduh ha ka lympung ïalehkai phutbol jong ka Mawlum Tyrsad Sports & Cultural Club ha Tyrsad.
Haba phai sha ka jingïalehkai final jong katei ka lympung, ka Mawlum Tyrsad kaba la ïakhun pyrshah ïa ka Kyiem Football Club na Wah Lyngkien, ka la khur ïa ka jingjop lyngba ka jingïashut tie-breaker hadien ba ka jingïalehkai ka la poi noh sha ka jingïakhaid da mar ar kol.
Ïa kane ka lympung ïalehkai la pynhap pyrda da u Bah Wellbirth Rani uba dei u Chairman jong ka NEIPF bad kumjuh u President barim ka Federation of Khasi Jaiñtia & Garo People (FKJGP) kum u kongsan ha ka jingïadonlang u MDC ka thaiñ u Bah Lamphrang Blah.
Ka Mawlum Tyrsad kaba la ïoh rah ïa ka nam lahduh ka la ïoh rah ïa ka song pisa kaba long T.80,000 ryngkat bad ka trophy, katba ka kynhun ba shah rem pat ka la ïohpdiang T.40,000 ryngkat ka trophy bad ïa kine ki khusnam la sam da u Kongsan bad u Symbud Kongsan.
