Shillong, Jymmang 19:
Ka Roma ba la long khlieh da u Jose Mourinho kum u manager ka la ïoh rung sha ka final jong ka lympung Europa League, hadien ba ka jingïakhun pyrshah ïa ka Bayern Leverkusen ha ka ‘second leg’ ka la kut noh ha ka jingïakhaid khlem da ka don ba la thep kol.
Ka jingïoh rung ka Roma sha ka final, ka la long hadien ba ka la jop ïa ka Leverkusen ha ka jingïakhun ‘first leg’ da 1-0 kol, ha kaba ïa kane ka kol la thep da u Edoardo Bove, kaba la biang pura ïa ka Roma ban jam sha ka final.
Ka jingïakhun final jong ka lympung Europa League kan long ha ka 31 tarik mynta u bnai ha Budapest, ha kaba ka Roma kan ïakhun pyrshah ïa ka Sevilla ban ïaknieh ïa ka nam lahduh.
Kumba ka long mynta, u Jose Mourinho u dei uba la jop ha baroh san tylli ki final ha ki lympung jong ka dewbah Europe kaba kynthup ruh ïa ka nam lahduh jong ka Europa Conference League bad ka Roma jong kane ka aiom kaba la leit.
“Ka jingsngewkhia jong nga, kam dei satia ban ïoh buh kyrteng lajong ha ka kot sahnam jong ka Roma,” la ong u Mourinho bad bynrap ba ka long ban ïarap ïa kine ki khynnah ba kin nangkiew bad kot sha ka thong kaba heh bad kumjuh ruh ban ïarap ïa ki nongkyrshan jong ka Roma kiba la aiti lut naduh mynsiem ka jingkyrshan naduh ka sngi kaba nyngkong bad kumta ka long shisha kaba kmen ban poi sa sha kawei ka final.
