Shillong, Jymmang 19:
Ka Congress kaba don sha ka Liang Pyrshah ka la pynpaw ba ka sngew biang bha hadien ka jingïalang jong ki seng saiñ pyrthei ban ïatai halor ka Roster System. Kane ka seng ka la pynpaw ba ka jingïatai ka long kaba biang namarba ka Sorkar ka la pynshai ban pyntreikam ïa ka Roster System shakhmat bad kan nym don ka jingleh shiliang ïa kano kano ka jaitbynriew.
Haba kren sha ki lad pathai khubor hadien ka jingïalang ha Secretariat, u MLA ka Congress, Bah Ronnie V Lyngdoh u la ong ba ka Sorkar Jylla lyngba u Myntri Rangbah ka la kren shai ba ka jingpyntreikam ka dei nangne shakhmat, hynrei kumba ka Ïingbishar ka phah peit naduh u snem 1972, ka dei tang ka jingpeit ïa ka jingsdang ba la pyntreikam ïa ka Reservation Policy ban ïoh ka jingkheiñ.
U Bah Ronnie u la ong ruh ba ym dei ban khuslai namar ka Roster kan nym long shiliang ïa kano kano ka jaitbynriew bad ki pateng kim dei ban khuslai ïa kane.
Haba kylli halor ka jingdawa pynbeit biang ïa ka Reservation Policy, u Bah Ronnie u la ong ba kumba ka long mynta ka Jylla ka long kaba donbok namar ka bhah thung kam ka la don lypa 80 hapdeng ki jaitbynriew trai muluk.
