“Kumta ïa ngi mynta ba ngin phaidien biang sha ki jingkheiñ jingdiah halor ka jingthung kam ba la leh mynshwa bad ka lynti ba la dep shim, kam dei satia ka kam kaba ngin lah ban leh bad ban wanrah ïa ka jingkylla. Kumta, ki jingkheiñ bad ki jingtip kiba ngi don naduh mynshwa ki ailad ïa ngi tang ban sngewthuh hangno ngi don mynta,” la ong u Conrad.
Shillong, Jymmang 19:
Ka Sorkar Meghalaya Democratic Alliance (MDA-II) ha ryngkat ki seng saiñ pyrthei bapher bapher ka la rai ban thaw da ka Committee halor ka Roster System ban ïatai sani shuh shuh ïa kane ka rukom kheiñ hapoh ka bhah thung kam hadien ba ka Sorkar ka la dep ban pyni ïa ki jingbatai ha ka jingïalang bad ki seng saiñ pyrthei ha Secretariat ha ka Sngi Thohdieng.
Ha kajuh ka por, ka Sorkar lyngba u Myntri Rangbah u Conrad K Sangma, ka la pynbna paidbah ba katba ka Committee ka dang ïaid ban pyndep ïa ka jingïatai ïa kane ka rukom kheiñ hapoh ka bhah thung kam (roster system), yn pynsangeh shwa ïa ki jingkhot thung kam kiba thymmai kiba dang dei ban pynmih da ki tnat treikam bapher bapher ka Sorkar Jylla.
Ha kane ka jingïalang, ki nongïalam jong baroh ki seng saiñ pyrthei kiba don ha Liang Synshar bad Liang Pyrshah ki la wan ïashim bynta ha kaba ki don kiba wan lang bad ki MLA, hynrei ki don ki seng kum ka VPP kiba khlem wan ki MLA.
Haba kren sha ki lad pathai khubor hadien ka jingïalang, u Myntri Rangbah u la ong ba ka Myntri ka tnat aiñ, ka Kong Ampareen Lyngdoh kan khlieh ïa kane ka Committee bad ki dkhot jong ka Committee kin sa don lang na kiwei pat ki seng saiñ pyrthei.
Haba pynpaw ba ka Reservation Policy ka la sdang naduh u snem 1972, hynrei u Myntri Rangbah u la ong ba ha ki 50 snem ba la leit, kaei kaba la jia ha ka jingthung kam kaba la leh ka dei kaei-kaei kaba la leh katkum ka reservation policy bad halor ki kyndon jong ka.
“Kumta, ïa ngi mynta ba ngin phaidien biang sha ki jingkheiñ jingdiah halor ka jingthung kam ba la leh mynshwa bad ka lynti ba la dep shim, kam dei satia ka kam kaba ngin lah ban leh bad ban wanrah ïa ka jingkylla. Kumta, ki jingkheiñ bad ki jingtip kiba ngi don naduh mynshwa ki ailad ïa ngi tang ban sngewthuh hangno ngi don mynta,” la ong u Conrad.
U Conrad u la ong ba ha ka jingïalang la batai ïa baroh ba ka roster system ka dei ka kam kaba ïai bteng bad ka long kaba donkam ban sngewthuh ïa u snem ba sdang namar ka ailad ïa ngi ban sngewthuh hangno ngi don mynta haba ïadei bad ka roster kaba ngi leh mynta.
Hynrei u Myntri Rangbah u la ong ba hadien ka jingïatai bad ka jingbatai, kiba bun ki seng saiñ pyrthei ki pynpaw ba ki la hun halor ka jingïatai kaba ïadei bad ka roster. U la pyntip ruh ba la ai jingpynshai halor ka kam ba ïadei bad ka kam pule puthi ba ka roster system kam treikam.
“Namarkata, ngi la rai ba khnang ban pyntikna ba ki jingpynshai kin don ïa baroh ki jingsngewkhia, la thaw ïa ka Committee ka ban khlieh da ka Myntri bad yn sa ailad ban pan ïa ki jingpynshai bad ban nang ai shuh shuh ïa ki jingai jingmut ba kumno ki tyrwa ne ai jingmut ba ngi dei ban jam shakhmat,” la ong u Myntri Rangbah.
