Shillong, Jymmang 19:
Ka Sorkar Jylla kan sa ïasyllok ruh bad kiwei ki kynhun seng halor ka Roster System khang ban kham shai shuh shuh ha ka rukom kheiñ ïa ka bhah thung kam bad rukom pyntreikam.
U Myntri Rangbah u Conrad K Sangma u la ong ba ka Sorkar ka la dep pyrkhat ba ka long kaba donkam ban ïatai lang bad kiwei ki kynhun kiba dei ki nongdon bynta lang ha ka Jylla khang ban don ka jingsngewthuh bad jingshai.
Kumta u la ong ba la kumno-kumno kan sa don ka jingïakynduh ha shwa ban kut mynta u bnai kaba lah ban dei ka jingïakynduh lang hajuh ban ïakren ïa kane.
Na ka liang u Myntri Rangbah u la kyntu ruh ïa baroh ki seng saiñ pyrthei ban ïatreilang na ka bynta ka jingïatylli kum ka Jylla bad ban shim ka jingkitkhlieh ban pynsngewthuh lang ïa baroh haba ïadei bad kane.
U la ong ba ka roster system kaba la batai mynta ka dei ka kam kaba bteng ban pyntreikam shakhmat. Hynrei ban tip hangno ngi don mynta haba ïadei bad ka roster system, donkam ban peit ïa ki jingkheiñ bad ki jingtip kiba ngi don naduh mynshwa kiba ailad ïa ngi tang ban sngewthuh hangno ngi don mynta.
Ha kawei pat ka liang, ka Khun Hynñiewtrep National Awakening Movement (KHNAM) kaba la dawa ban pyntreikam ïa ka roster shakhmat, ka la urlong ka jingdawa jong ka ban buhteng shwa ïa ki jingkhot thep kam tat haduh ban da dep ka Committee ban ïatai bad ai jingmut halor ka Roster System.
U Vice President ka KHNAM, Bah Thomas Passah, u la ong ba ha ka jingïalang jong ki seng saiñ pyrthei, la pynsngew ba donkan ban buhteng shwa ïa ka jingkhot ban thep kam namar katba dang ïakren ban pynbeit kam lah ban long ba ka jingthung kam ruh kan nang ïaid.
Hynrei ka KHNAM ka la dawa ba haba ïakren shaphang ka Roster System, dei ruh ban ïakren shaphang ka Reservation Policy namar kine baroh ar ki don ka jingïasoh.
U Bah Thomas u la ong ba ka jingmynjur ka Sorkar ban thaw ïa ka Committee halor ka Roster System ka dei kaba donkam namar yn sa ïoh ban ïatai kham sani.
U la ong ba wat u Myntri Rangbah banyngkong ka Jylla ruh, ki la kylli teng halor ka jingïoh bhah 40 ïa ki Khasi Jaiñtia bad 40 ïa ki Garo bad ka jubab kaba ma u hi u la ai ka jubab haba ka jingmang 40 percent ïa u Garo ka dei namarba ki paid Garo ki dang duna palat ha ki tnat treikam ha kito ki por.
U Bah Thomas u la ong ba ban ïakren tang ïa ka Roster kam don jingmut namarba ka Roster ka don jingïadei bad ka Reservation Policy.
