New Delhi, Jymmang:
Ka long ruh ka sien kaba ar jong ka aiom ialehkai ba mynta ha kaba ka India ka lah shah jied mynta na ka bynta ka FIFAe Nations Cup. Kumta ruh katei ka lympung ialehkai lah niew kum ka bynta ba kongsan bad ba hakhmat tam eh jong ka FIFA esports napdeng ki Member Associations jong ka synjuk pyniaid jingialehkai phutbol bahakhliehduh ha ka pyrthei.
Kumba ka paw hi ka long ba ka India ha kaba nyngkongeh ka lah shimbynta ha ka FIFAe Nations Series ha u snem 2021 bad kaba lah ialehkai bha kum ka kynhun ialehkai ha ka jingiakhun bad kiwei pat ki ri na ka bynta ban shah jied haduh arsien ha ki lai snem jong ka tei ka lympung ialehkai ia kaba lah tip ruh kum ka ‘World Cup of FIFA esports’.
Ka khubor ka iathuh ruh ba ka India ka lah shah pynliem noh ruh na ka rynsan iakhun Group jong ka FIFAe Nations Cup 2022 kaba lah long ha Denmark ha u bnai Naitung 2022.
Kumta ruh ka kynhun ialehkai ka ri ka eTigers kan ialehkai mynta na ka bynta ban ialehkai bha bad ban thaw rekod ruh mynta ka kynti napdeng ki 24 tylli ki ri ki ban shah jied sha ka FIFAe Nations Cup 2023. Shuh shuh nalor ka India, kiwei pat ki lai tylli ki ri kiba kynthup ia ka Australia, Malaysia bad Singapore ki lah shah jied na ka thain Asia & Oceania na ka bynta ka rynsan iakhun ba khatduh ha kaba kitei ki ri kin sa shah pyniasohlang ruh bad ki 11 tylli ki kynhun ialehkai na ka thain Europe, 3 na ka thain Middle East bad Africa, 3 na South America bad 2 na North & Central America ryngkatlang bad ka ri ka ban pynlong ia ka tei ka lympung ialehkai.
Shuh shuh ruh ka khubor ka iathuh ba ka India ka lah sdnag ia ka jingiaid lynti jong ka ha ka FIFAe Nations Series 2023 naduh u bnai Nohprah 2022 ha ka Play-Ins stage bad ba ka kynhun ka lah iakhun ia ka Online Qualifiers Main Stage ha u bnai Iaiong mynta u snem ha shuwa ba kan shah jied sha ka Playoffs.
Kumta ruh ha ka rynsan iakhun Playoffs ia kaba lah mihkhmat da u Charanjot Singh ka #eTigers, u Saransh Jain, Siddh Chandarana bad Saksham Rattan kiba lah shah pynrem noh ha ka kylla iakhun kaba nyngkong jong ka Double Elimination Bracket da ka aggregate kamai ka kynhun kaba long 2-3 ia ka Indonesia ha ka jingiakhun jong ki, hynrei katei ka kynhun ialehkai ka ri ka lah iakhun pyrshah da ki jingjop ba ka lah khur pyrshah ia ka New Zealand (0-9 ha ka aggregate) bad Japan (1-2 ha ka aggregate) bad ba ka kynhun ka lah ai khublei ruh ia ka kol ba ka lah ioh ban kamai ha ka injury-time na ka bynta ban jaka syndon sha ka FIFAe Nations Cup 2023.
