Shillong, Jymmang 21:
Khnang ban nym ktah eh ïa kiba thep kam, ka Sorkar Jylla ka kwah ba ka jingïatai da ka Committee halor ka Roster System ka dei ban dep kham kloi la kumno-kumno ha u Jylliew.
Ka Sorkar ka la pynbna ban sangeh shwa ïa ki jingkhot thep kam thymmai ha ki tnat treikam bapher bapher tat haduh ban da dep ban pynbeit ïa ka Roster System lane ka rukom kheiñ ïa ka bhah kumba la bthah da ka Meghalaya High Court.
Ïa ka Committee halor ka Roster System la thaw ha ka jingïalang jong baroh ki seng saiñ pyrthei kaba la long ha ka 19 tarik mynta u Jymmang. Ïa kane ka Committee la khlieh da ka Myntri Sorkar kaba peit ïa ka tnat aiñ, ka Kong Ampareen Lyngdoh ha kaba ki nongïalam na kiwei pat ki seng saiñ pyrthei kin sa long lang ki dkhot.
Ka tyllong khubor ka ïathuh ba ka Sorkar ka kwah ba ka Committee kan nym shim por than da kaba shong jingïalang kham bunsien bad lada long kaba lah, hap pyndep noh la kumno-kumno ha u Jylliew.
Dang shen hadien ka jingïalang jong ki seng saiñ pyrthei, u Myntri Rangbah u Conrad K Sangma u la ïathuh ba ka Reservation Policy ka dei kaba la sdang naduh u snem 1972, hynrei u la ong ba ha ki 50 snem ba la leit, kaei kaba la jia ha ka jingthung kam ka dei kaei-kaei kaba la leh katkum ka reservation policy bad ki kyndon jong ka.
Kumta u la pynshai ba “ïa ngi mynta ba ngin phaidien biang sha ki jingkheiñ jingdiah halor ka jingthungkam ba la leh mynshwa bad ka lynti ba la dep shim, kam dei satia ka kam kaba ngin lah ban leh bad ban wanrah ïa ka jingkylla. Kumta, ki jingkheiñ bad ki jingtip kiba ngi don naduh mynshwa ki ailad ïa ngi tang ban sngewthuh hangno ngi don mynta,” u la ong.
Haduh mynta, ka dang don ka jingartatien ïoh ba ka jingpyntreikam ïa ka Roster System ka dei kaba yn leh da kaba phai shadien, kata, naduh ki snem ba mynshwa, ym da kaba ïaid nangne shakhmat naduh ba la pynmih hukum ka Ïingbishar ha u Ïaïong, 2022.
Kum ban pynkynmaw, ka Meghalaya High Court lyngba ki ar ngut ki nongbishar, u Chief Justice Sanjib Banerjee bad u Justice Wanlura Diengdoh ka la pynmih ïa ka jingbthah ha ka 5 tarik Ïaïong, 2022 ha kaba ka la bthah ban pynsangeh shwa ïa baroh ki jingpynrung kam halor ka nongrim ba ha ka por ba khot ban thep kam, ki tnat Sorkar bad kiwei kiwei ki shnat treikam kiba hap ban bud ïa ka bhah thungkam ne ‘Reservation Policy,’ ki khlem pyni satia ïa ka ‘Roster System’ lane kim pyni shai ïa ka rukom mang ne rukom kheiñ ïa ki kam na ka bynta ki jaitbynriew bapher bapher katkum ka ‘Reservation Policy’ lane ka jingbhah lypa ïa ki kam katkum ka ‘Reservation Policy’ ha ka por ba khot ban thep kam.
