Dang sah sa 8 lak Metric Ton u dewïong uba dang hap ban lilam, ai jingbthah ka sorkar ïa ki trai dewïong

Ïa u dewïong ba dang sah, kata, 8,15,386.635 MT, yn sa die lilam noh katkum ka por ba la buh.

Shillong, Jymmang 21:

Ka sorkar jylla lyngba ka tnat Mining and Geology ha ka Sngi U Blei ka la pyntip ba dang sah sa 8 lak Metric Ton u dewïong uba dang hap ban lilam, katba 5 lak Metric Ton la dep ban lilam da ka Coal India Limited bad ka jingkit ïa une u dewïong ba la lilam ka dang ïaid.

Ka tnat ka la pyntip ba hadien ba la pynlong biang ïa ka jingthew ha u snem 2022-23 ïa u dewïong ba la dep tih, la shem ba u don haduh 14,10,710.41 MT. Na kane, la dep ban lilam 5,95,323.775 MT da ka Coal India Limited, bad ka jingkit ïa une u dewïong na ki jaka ba la buh ka dang ïaid.

Ïa u dewïong ba dang sah, kata, 8,15,386.635 MT, yn sa die lilam noh katkum ka por ba la buh.

Ka tnat ka la pyntip sha baroh ki trai jong u dewïong bym pat lilam ba kin pan ïa ki Transit Pass na ki Deputy Commission khnang ban lah ban kit noh na ka par dewïong sha ka jaka lum thup ba la buh da ka Coal India Limited.

Ïa ki jaka lum thup dewïong kiba don shabar na kito ki jaka ba la ithuh, yn kurup noh bad ka sorkar kan sa pynshitom ïa ki trai jong uto u dewïong katkum ki kyndon ka MMDR Act, 1957.

Nalorkata, lada lap ba u dewïong um don lane u duna ban ïa kaei kaba la dep ban thew biang, yn pynshitom ïa u trai jong uta u dewïong katkum ki kyndon ka MMDR Act, 1957.

Shuh shuh la ong ba shisien ba la kut ka por na ka bynta ban lilam lut ïa baroh 14,10,710.41 MT u dewïong, ka sorkar kan sa shimti lut ïa baroh u dewïong uba dang sah la u dei uba don hapoh ne shabar jong ki jaka ba la ithuh, bad ka sorkar kan sa lilam noh bad ïa ka pisa kaba mih, yn thep beit sha ka pla tyngka jong ka sorkar. Hynrei ka sorkar ka la ong ba ki trai jong uta u dewïong kin ym lah shuh ban kam trai lane ban pan ïa ka pisa kaba mih na ka jinglilam ïa uta u dewïong.