Shillong, Jymmang 21:
Ha kine ki hynriew tylli ki snem naduh 2018, ka jingduna ka um ha pung Umïam ha u bnai Jymmang ka la long shaba pat mynta u snem.
Katkum ki jingkheiñ kiba ka Meghalaya Energy Corporation Ltd (MeECL) ka la buh jong u bnai Jymmang ha kine hynriew tylli ki snem, la sakhi ba ka jinghiar ka um ka la long shaba palat mynta u Jymmang, 2023.
Ka pung Umïam ka don ïa ka jingjylliew kaba long 3,220 phut. Lada ka um ka la jan poi haduh 3,220 phut, bunsien ka MeECL ka ju pyllait teng noh ïa ka um.
U Nongsaiñ Hima u la ïoh ban ïanujor da kaba lum ïa kine ki jingkheiñ haba ïadei bad ka jingdon ka um ha pung Umïam ha u bnai Jymmang ha kine ki hynriew snem naduh 2018 haduh 2023.
Katkum kine ki jingkheiñ, la sakhi ba ka jingdon ka um ha u Jymmang kaba kham pyndap bha ïa ka pung Umïam ka dei ha u Jymmang 2022 namar ka um ka kiew sha ka 3,185 phut bad 3,186 phut.
Hynrei mynta u Jymmang, 2023 haduh ka 17 tarik, ka um ka la hiar sha ka 3,164 phut; kaba mut ba ka um ka la hiar haduh 56 phut eiei na ka 3,220 phut.
Ka pung Umïam ka don ha ka jingma ban nym lah ban pynmih ding ilektrik lada jia ba ym hap u slap bajur ha kine ki sngi ban sa wan na ka bynta ban pyndap biang ïa ka pung kumba ju long ha ki snem ba la leit.
Ka Jylla ka hap ban mad ïa ka jingkyrduh ding ilektrik namar ba ki jaka pynmih bording ki duna bha bad kiba don ruh ki lah ban pynmih tang khyndiat namar ka jingduna palat ka um.
Ka pung Umïam ka dei ruh kaba la dap bha da ka ktieh kiba wan tuid lyngba ki wah na sor Shillong kum ka Wah Umkhrah bad Umshyrpi kiba dei ruh ki wah kiba la jaboh tam bad kiba la don ha ka thup jong ka National Green Tribunal (NGT).
Ka pung Umïam ka dei ruh kaba la don jingma namar ka rta jong ka, ka la kut namar ba la dap palat ka ktieh ha kane ka pung.
Dang shen, u Myntri ka tnat bording, u AT Mondal u la leit khmih hi ïa ka bynta kaba la den ïa ka pung Umïam na ka bynta ban sngewthuh bad tip tikna ïa ka jinglong jingman jong kane ka jingtei khamtam namarba ka donlang bad ka jingkieng kaba ju ïaid ki kali man la ka sngi.
