Shillong, Jymmang 21:
Ka Shillong Lajong FC ka la lah ban pyntikna ban wanphai biang sha ka lympung I-League hadien ba ka lah ban pynliem ïa ka FC Bengaluru United da 2-1 kol ha ka jingïalehkai kaba khatduh jong ka Second Division League ha ka Sngi U Blei ha SSA Stadium, Polo.
Ka jingwanphai biang kane ka kynhun ïalehkai na nongbah sha ka I-League ka long hadien saw snem naduh ba shah pynhiar kyrdan ha ka aïom ïalehkai 2018-19.
Kane ka la wan urlong lyngba u Everbrightson Sana Mylliempdah bad u Figo Syndai na ka bynta ban pynlong ïa ka Shillong Lajong FC ban kiew sha ka kyrdan ba hakhlieh, katba ka Ambernath United ka la shah rem da 4-3 kol ha ka United SC ha Kolkata.
Ha kane ka jingïakhun kaba khatduh jong ka wat kaba khatduh (final round) ha la ïing la wan ban sakhi lang da palat san hajar ngut ki paidbah nongkyrshan. Ha kane ka jingïalehkai, u coach ka Shillong Lajong FC u Bah Bobby Lyngdoh Nongbet u la pynmih bujli ïa saw ngut ki rangïalehkai naduh kaba sdang da kaba u la pynïalehkai ïa u Figo, Rajat Paul Lyngdoh ha ka bynta ba shakhmat, katba u Ïohborlang Lyngdoh Lyngkhoi bad u Hamedamanbha Wahlang ki la mih bujli ha ka jaka u Bishal Lama, Sambor Kharsahnoh, Babysunday Marngar bad u Atlanson Kharmaw.
Kumba ka paw ha kane ka jingïakhun kaba khatduh, ki rangïalehkai na baroh ar tylli ki kynhun ki la ïakhun tyngeh naduh kaba sdang. Ka Shillong Lajong FC ka la ïoh ban pynkhih jar nyngkong eh ha shwa ban kut ka jingïalehkai jong ka kylla step lyngba u Everbrightson (43), uba la shut beit beit sha kol ha kaba u rangapkol ka Bengaluru um shym la lah ban leh eiei.
Hadien katto katne por ba la bteng ïa ka jingïalehkai jong ka kylla miet, ka Bengaluru ka la pynphai kylla lyngba u Kongbrailatpam Manjit Sharma ha ka minit kaba 51 na ka bynta ban ïakhaid mar shi kol.
Da kane ka jingïakhaid ka la pynlong ïa baroh ar kynhun ban sei bor bah ha ka ban ïakhun tyngeh, hynrei u Figo u la lah ban pynurlong da kaba ïoh thep na kyndong ha ka minit kaba 82 na ka bynta ban pynlong syndon ïa ka Shillong Lajong FC ban khur ïa ka jingjop.
Lyngba kane ka jingjop, ka Shillong Lajong FC ka la kamai 7 dor-thong (point) na ki saw sien ïakhun, katba ka Ambernath United (6 dor-thong) bad ka Delhi FC (4 dor-thong), ki la don ha ka kyrdan ba-ar bad balai bad sah sa mar shisien jingïalehkai. Kumta kine ar tylli ki kynhun kin hap ban ïakhun tyngeh ha ka jingïalehkai kaba khatduh ha ka 26 tarik na ka bynta ban long sa kawei pat ka kynhun ka ban ïoh rung sha ka I-League, namar ar tylli ki kynhun kin ïoh rung sha katei ka lympung.
Kumba ka paw ka Shillong Lajong FC ka long ka klob kaba nyngkong eh na ka thaiñ Shatei Lam Mihngi ban ïoh rung nyngkong sha ka I-League ha ka aïom ïalehkai 2009-10. Hynrei tang hadien shisnem ka la shah pynhiar kyrdan noh bad ka la wanphai biang sha ka I-League ha ka aïom ïalehkai 2011-12 ha kaba ka la ïai neh haduh hynñiew snem kynthih.
