Guwahati, Jymmang:
Ka jylla Mizoram ka la ïoh bat ïa ka kyrdan kaba hakhmat eh hapdeng ki jylla jong ka thaiñ shatei lam mihngi kaba la lah ban pyntreikam janai ïa ka skhim Jaal Jeevan Mission (JJM) ha kaba ka la lah ban pynbiang haduh 85.68% ki kor umdih sha ki longïing longsem ha ki thaiñ nongkyndong jong ka jylla. Ha kawei ka liang, ka jylla Assam ka la ïoh bat ïa ka kyrdan kaba ha trai duh napdeng ki jylla ka thaiñ shatei lam mihngi ha ka jinglah ban pyntreikam janai ïa ka skhim JJM. Ka sorkar Assam ka la lah ban pynbiang ïa ki kor umdih tang sha ki ki 49.15% ki longïing longsem.
Kum ban shu ïathuh hangne, dang ha ka Sngi Balang mynta ka taiew, na ka liang u Myntri Rangbahduh jong ka ri – Narendra Modi u la pynpaw ïa ka jingsngew kmen kaba khraw halor ka jinglah ban pynbiang ïa ki kor umdih sha ki 12 klur ki longïing ha kylleng ki bynta jong ka ri India na ka jinglah ban pyntrei kam janai ïa ka skhim JJM.
Kat kum na jinglum jingtip jong ki bor sorkar ka tnat Jal Shakti, la lap ba na 1,33,060 tylli ki longïing ha ka jylla Mizoram, la lah ban pynbiang ïa ki kor umdih sha ki 1,14,007 tylli ki longïing (85.68%).
Ka thaiñ Kolasib district jong ka jylla Mizoram ka la wan ha ka kyrdan kaba hakhmat duh ha ka jinglah ban pyntreikam ïa ka skhim JJM ha kaba la lah ban pyntrei ïa haduh 96.67%. La ïoh jingtip ba watla 16 na ki 34 tylli ki shnong ka thaiñ ki dei ki shnong kiba la don lypa ïa ki kor umdih, na ka liang ka sorkar ka la shim ïa ki sienjam kiba kyrpang ban pynbiang ïa ki kor um sa sha ki longïing jong ki 18 tylli ki shnong kiba dang sah.
Ka distrik kaba la wan ha ka kyrdan kaba ar ka dei ka Serchhip District (91.7%) bud sa ka Aizawl district (90.30%). Ka distrik kaba wan ha ka kyrdan kaba ha trai duh ha kaba ïadei bad ka jinglah ban pyntreikam ïa ka skhim JJM ka dei ka Lawngtlai district (75.21%).
Haba phai sha ki jylla jong ka thaiñ shatei lam mihngi, ka Arunachal Pradesh ka la wan ha ka kyrdan kaba ar (77.54%) ha ka jinglah ban pyntreikam janai ïa ka skhim JJM, bud sa ka jylla Manipur (76.58%), Nagaland (67.42%), Tripura (62.74%), Meghalaya & Assam (49.15%).
