Kohima, Jymmang:
Ki bor sorkar jong ka jylla Nagaland ha ka jingleit khynra halor ki mat kiba ïadei bad ki mokotduma pynkheiñ kyndon Inner Line Permit (ILP) ki la ïoh ban kem ïa haduh 325 ngut ki bar jylla kiba la donkti ban pyndonkam bakla bad pynkheiñ ïa ki kyndon jong ka ILP.
Ïa katei ka jingleit khynra la pynlong ha ka Sngi Ba-ar mynta ka taiew da ki bor pynïaid distrik jong ka Kohima ha ryngkat ka jingïatreilang bad ki bor pulit jong ka jylla.
Ha katei ka jingleit khynra jong ki, ki la lap ba ki la don bun bah ki bar jylla kiba dang shong dang sah ka Nagaland wat hadien ka jingkut noh jong ki jingai jingbit kat kum ka ILP. Ïa kitei ki bar jylla la daiñ kuna bad pynngat hapoh ka Sections (2), (3) bad (4) jong ka Bengal Eastern Frontier Regulation (BEFR) Act of 1873.
Hadien ba ki bor sorkar ki la khmih bad tohkit bniah ïa baroh ki kot ki sla ba donkam, ki la ïoh lum ruh ïa T.1.2 lak ka kuna. Na ka liang ka shlem treikam jong u District Public Relations Officer (DPRO) ka Kohima u la pyntip ba ïa katei ka pisa yn lum bad kheiñ kum ka kuna na ka bynta ka sorkar jylla.
Na ka liang ka shlem trei kam ka la pyntip shuh shuh ba ka kynhun Special Task Force kaba la thaw ban khmih bniah na ka bynta ka ILP kan dang ïai bteng ban leit pynlong ïa ki jingkhynra ha kylleng ki bynta jong ka thaiñ kat kum ka jingïoh ïa ka jingbtah bad jingai bor jong u Deputy Commissioner ka Kohima.
