Queensferry, Jymmang:
Ha kane ka khubor la ong ba ka Britain kan long ka ri kaba nyngkong eh ban pyntreikam ia ki bos bym donkam nongñiah hapoh Scotland ha kane ka por.
Ka jingthmu jong katei ka kam ka long ban kit kumba 10,000 ngut ki nongleit nongwan hapoh ka shi taiew ha ka jingjngai kumba 14 mile lane 22.5 kilometre.
Ia ki rukom treikam jong katei ka bos la dep ban peit bniah bad ban peit thuh naduh ki por ba la leit, hynrei dei ha kane ka por ba ki bor pyniaid ka UK ki la rai ban pyndonkam bad ban pyntreikam ia kitei ki bos ha ka kam paidbah.
Kumta la ong ba naduh ka Sngi Nyngkong, kitei ki bos ki la sdang ban kamai bad ban iaid kumba 50 miles ha ka shi kynta bad la buh ruh da ki nongñiah lane ki nongpynïaid kiba tbit bad kiba biang bha naka bynta ban pyniaid shakhmat ia katei ka kam.
La ong ba ki nongñiah ‘driver’ kim donkam shuh ban ktah ia ka kali haba la buh ha ka ‘Autonomous Mode’ bad ki nongbud bos ruh kin shu shim tang ia ki tiket ban tip ia ka jaka ba ki pasenjar kin leit bad kin hiar.
Katei ka bos ka don ia ki tiar ba la pyndait, ha kaba kitei ki tiar kin peit thuh haba don kiwei pat ki kali kiba wan na kajuh ka liang ne kiba lah ban iatyngkhuh markhmat bad katei ka bos bad la pyndait ruh ia ki camera ha katei ka bos khnang ban peit thuh lada don kiei- kiei ki jingeh ne ki jingthud ha ka lynti iaid.
Kitei ki tiar kiba la pyndait ha katei ka bos, ki long ruh kiba lah ban ai jingtip sha ka ‘Engine’ jong katei ka bos ba kan lap ia ka surok bad ka lynti kaba jan bad kaba biang tam naka bynta ban iaid lynti.
Ka jingthmu jong ka jingwanrah ia kitei ki bos ka long naka bynta ka jingshngaiñ jong ki paidbah nongleit- nongwan.
Namar u nongñiah ha kane ka bos ba mynta, u don ia ka bor ban iohi kaba haduh 360 degree bad kitei ki tiar kiba la pyndait ha kitei ki bos ruh ki long kiba stet palat shah ban ia kaba u briew u lah ban leh.
Watlakatta, la ong ba la buh ruh ia ki nongñiah ha kitei ki bos, namar kumba la ju tip hi ba ka kham bha ba don da u nongñiah ban ia ka bos ne ka kali ka ban iaid hi khlem u nongñiah. Namarkata la ong ba lada donkam lane haba don ki khep kiba hap ban pyntreikam da u briew, kitei ki nongñiah ki lah ban pyniaid bad leh ia kaba donkam ha ryngkat ka jingiarap jong kitei ki tiar kiba la pyndait ha kitei ki bos.
Ha u snem 2021, ki bos ba khlem nongñiah ki la sdang ban treikam nyngkong eh ha Malaga jong ka Spain, ha kawei na ki projek ba nyngkong eh hapoh Europe.
