Shillong, Jymmang 21:
Ka skul K.J.P lane ka K.J.P Girls’ Higher Secondary School, Shillong, ka dei ka skul banyngkong tam ha ka thaiñ Shatei Lam Mihngi ban ai jinghikai tang ïa ki khynnah kynthei, bad ha ki 131 snem tam ba ka la don, ka la sei shibun ki ’thei kynsai kiba la paw ym tang ha ka jylla, hynrei ha ka Ri baroh kawei.
Kane ka skul ka dei kaba la mih na ka skul ba la seng da ki Missionary na Wales ha ka shnong Nongsawlia, Sohra ha u snem 1864. Hadien ba shi bynta na ka skul la pynkynriah na Sohra sha Shillong ha u snem 1887 hapoh ka jingkhmih jong ka Hugh Roberts, ka K.J.P Girls’ Higher Secondary School, ka la kylla long noh ka skul tang na ka bynta ki khynnah kynthei ha u snem 1892. Ka Welsh Presbyterian Mission Society ka la phah ïa kawei ka Missionary, Bessi Williams, ban shimti ïa ka jingpynïaid ïa kane ka skul.
Ha ki snem kiba mynshwa, ki kmie ki kpa kiba shong ha Mizoram, Arunachal Pradesh, Nagaland, Siliguri bad kiwei pat ki la ju phah ïa ki khun kynthei jong ki ban pule ha K.J.P. Girls School.
Watla kane ka skul ka dei kaba la mih na ka skul ba la shna ha Nongsawlia, Sohra, ka Khasi Jaiñtia Presbyterian Synod, kaba dei ka kynhun kaba kyrshan ïa ka K.J.P Girls’ Higher Secondary School, ka la pdiang da kawei ka sur ba ïa kane ka skul la seng ha u snem 1892.
Ka K.J.P. Girls’ High School ka la rakhe ïa ka jingdap 100 snem ha u snem 1992 bad ha u snem 1999, la kyntiew kyrdan ïa ka sha ka Higher Secondary School.
Ha kine ki 131 snem tam, ka K.J.P Girls’ Higher Secondary School ka la pynmih ïa shibun ngut ki ’thei kynsai kiba la long kiba paw ha ka jylla bad ka Ri. Napdeng jong kine ki kynthup ïa i Kong Silverine Swer bad Kong E.N Shullai kiba la ïoh ïa ka khusnam Padmashree, Kong Mavis Dunn Lyngdoh, iba long i ’riew kynthei banyngkong ban long Myntri ha ka sorkar Assam, Kong Bonily Khongmen, i ’riew kynthei banyngkong ban long i dkhot ka Parliament jong ka Ri, I Kong Rose Milian Bathew Kharbuli, iba la long teng i Chairperson ka UPSC nalor kiwei pat.
