Shillong, Jymmang 21:
U President ka synjuk pynmih phlim hapoh ka jylla ka Meghalaya Film Makers Association (MeFliMA), Bah Commander Shangpliang, u la pynsngew sha ki nongpynmih phlim kiba wan ïashim bynta ha ka Cannes Film Festival kaba la long ha France ba ka Sohra ka dei kawei na ki jaka kaba itynnad bha ha Meghalaya ban ringdur ïa ki phlim.
U Bah Shangpliang uba la mih na Shillong naduh ka 16 tarik Jymmang, 2023 bad don mynta ha France ban ïashim bynta ha ka Cannes Film Festival un sa mih noh na katei ka ri ha ka 23 tarik mynta u bnai.
Kum ban shu pynkynmaw ïa u Bah Shangpliang la jied da ka Sorkar India lyngba ka tnad Information and Broadcasting da ka jingmynjur ka sorkar jylla ban leit mihkhmat sha Cannes Film Festival khnang ban ïoh shibun ki jingmut ha liang ki kam pynmih phlim hapoh ka jylla.
Haba ïakren bad u Bah Shangpliang, u la ïathuh ba ki don kumba 13 ngut kiba shah jied na North East India ban leit sha Cannes Film Festival bad lada kheiñ baroh shi India la bun ngut bha.
“Nga la ïoh ban ïakynduh ïa ki puron kiba paw ha ki phlim Hindi kum ka Sara Ali Khan, Diana Penty bad ka Esha Gupta bad kiwei de ki nongak phlim na pyrthei nga la ïakynduh” u la ong.
Nalor kata, u Bah Shangpliang u la pynpaw ïa ka jingsngewkmen ba ka phlim lyngkot ba la shna da u Bah Nicholas Kharkongor kaba ai kyrteng ‘Dewlynnong’ la ïoh ban pyni ha kawei ka jaka ba pyni tang ki phlim na India ha kane ka tamasa phlim.
“Ha ka jingïakynduh bad ki nongpynmih phlim na kylleng ka pyrthei nga la pynpaw ba ka Meghlaya ka don ïa ka jaka kaba itynnad kum ka Sohra bad kiwei de ki bynta bad bun ki la kwah ban ïohi ïa ka jylla Meghalaya” u la ong.
Shuh shuh u la ïathuh ba u la ïoh shibun ki jingai jingmut kumno ban pynkhreh ïa ki International Film Festival, kumno ban wad nongïarap pisa haba shna phlim bad don ruh ki briew na kiwei ki ri ban ïarap pisa haba pynmih lang ïa ka phlim.
Kum ban shu pynkynmaw ki don saw ngut ba ka sorkar jylla ka la phah kyrteng sha ka Sorkar India, kita u Bah Commander Shangpliang, Bah Pradip Kurbah, Bah Nicholas Kharkongor bad u Dominic Sangma, hynrei hadien ba ka sorkar India ka la mynjur ïa ka kyrteng u Bah Commander bad Bah Nicholas ka la mih ka jingïakynthoh haduh ba u Bah Nicholas u la weng noh ïalade.
Wat la ka sorkar ka la mynjur noh ïa ka kyrteng u Dominic Sangma ryngkat u Bah Commander, hynrei ha Cannes Film Festival la poi tang u Bah Commander Shangpliang marwei.
