Sydney, Jymmang:
Katkum ka khubor ba la ioh lum ka iathuh ba na ka liang jong u khlur ialehkai Tennis ka ri Australia u Nick Kyrgios u lah hap ban kynran-dien noh ban shimbynta ha ka lympung iakhun Grand Slam ka ban sa long ka French Open. Kane ka wan jia na ka daw jong ka jingnang iai ban ka jingshitom ha ka kjat kaba u lah mad ha ka por ba u dang iakhun pyrshah ia u briew uba ialeh ban tuh ia ka kali jong u.
Kumta na ka liang jong ka French Tennis Federation ka iathuh ba utei u rangialehkai un hap ban duh noh na ka jingshimbynta ha katei ka lympung na ka daw jong ka jingshah puid ka kjat kaba lah dep ban leh naduh u bnai K’lyngkot ha ka jingshna pynbha ia ka kjat kaba lah pait-doh na katei ka jingjia. Ha kaba ia dei bad katei ka jingjia, na ka liang utei u rangialehkai u lah khot ia ka tnad pulit da kaba pyndonkam da ka Application na ka phone jong u kaba lah iarap ha ka ban buddien ia ka kali kaba u lah shah tuh, hynrei ka long pat ka bym shym la shai ba kumno pat u lah ngat ha ka jingmynsaw ha ka kjat jong u.
Kum u khlur ialehkai Tennis ka ri Australia, u Nick uba lah rung sha ka jingiakhun phianal ha ka Wimbledon 2022, u bat ia ka kyrdan ba 26 ha ka pyrthei; um shym la ialehkai shuh ha katei ka lympung iakhun Grand Slam naduh ka jingshah pynliem ka jong u ha ka kylla iakhun kaba ar ha katei ka lympung ha u snem 2017. U long ruh u rangialehkai u bym shym la paw ha katei ka lympung, da kaba kynjoh ruh sha ka kylla iakhun kaba lai tang ha ki ar lympung iakhun jong ki san sien ialehkai kaba u lah shimbynta.
