Shillong, Jymmang 21:
Ka Khasi Students’ Union Shnongpdeng Unit bad ka Bakur Dawki Unit ka la pynlong ïa ka Maitshaphrang Football Tournament 2023 kaba lai sngi ha madan phutbol Dawki naduh 16 haduh 18 tarik mynta u bnai.
Ïa kane ka lympung la wan pynkut da u Kongsan Bah Lambokstar Marngar uba dei President Rangbah jong ka seng ha ka 18 tarik ha ka jingsynranlang u Samla Laitphar Syngkrem, President West Jaiñtia Hills District Unit, Samla Shiningstar Kharbihkhiew, Environmental Secretary Sengkmie, Samla Sonstar Nongkhlaw, Assistant Finance Secretary Sengkmie. La ïadonlang ruh u Dolloi ka Elaka Darrang Dolloiship, u Rangbah Shnong Shnongpdeng bad kiwei kiwei ki ’riew rangbah bad ki nonghikai.
Ka jingthmu jong ka Seng ban pynlong ïa kane ka lympung ïalehkai ka long ban ïarap ïa ki samla ba donsap ha ki kam ïalehkai phutbol bad ban kyntiew ïa ki ha ki kam ïalehkai. Sa kawei ka jingthmu ba kongsan jong ka seng ka long ban ïarap ïa ki skul kiba don ha Shnongpdeng, Dawki bad Bakur, kiba kum ka Seng ka ju ïarap na ka por sha ka por, namar ba bun ki khynnah ki wan na ka longïing kaba duna ha ki liang baroh.
Kumta ka seng ka ai khublei ïa baroh kiba ïarap ban wan ïashim bynta ha kane ka lympung ban pyni shisha ïa kata ka sap ka phong ha ka jingïalehkai phutbol. Ka Unit jong ngi ka ai khublei ïa u President Rangbah uba la ai ki kyntien sneng ïa ki rangïalehkai bad ki samla ka thaiñ ba ki dei ban trei shitom ym tang ha ka thaiñ wat shabar ka jylla ruh ban wanrah ïa ka nam ka burom jong ka ri bad jaitbynriew jong ngi.
Ha kane ka jingïalehkai ïa ka nam lahduh la rah da ka Tyllilang FC.
