Khliehriat, Jymmang 21:
Ka MLA jong ka Sutnga-Saipung, ka Kong Santa Mary Shylla ka la bthah ïa ki nongtrei ka NHAI ban moramot mar-mar bad tehlakam ïa ki bynta ba shong um ka surok bah NH-6 kaba pynïasoh ïa ka Meghalaya sha Mizoram, Tripura bad ki bynta ka Assam bad Manipur.
Ka Kong Shylla ka la bthah ïa ki nongtrei ka NHAI ha ka jingleit jurip ïa ka NH-6 na Lumshnong sha Malidor ryngkat bad ki nongtrei ka DC ophis bad nongtrei ka NHAI.
Ka MLA kynthei ba nyngkong na Sutnga-Saipung konstitwensi ka la pynpaw ka jingsngewkhia ïa ka jingsniew ka surok bad kaba dap sa tang ki thliew ki syar ha kiba bun bynta jong ka surok. Shuwa kane, ka Kong Shylla ka la leit jurip ïa artylli ki PHC ka Lumshnong bad Umkiang PHC. Ka la ïakren bad ki nongtrei kumjuh ki nongwan shim dawai ban sngewthuh ïa ka jingeh jong ki. Shibun ki jingeh ba ki nongtrei ki la pynsngew sha ka MLA bad ka la kular ban ïakren bad ka Sorkar Jylla.
