Shillong, Jymmang 21:
Hadien ba ka ding kaba klang ka la bam duh ïa kawei na ki skul kaba la rim bha hapoh ka Jylla – Khasi Jaiñtia Presbyte-rian Girls’ Higher Se-condary School (KJPG-HSS), u Myntri Rang-bah, u Conrad K. Sang-ma ha ka Sngi U Blei u la leit ban pyntngen bad ai mynsiem ïa ki bor pynïaid jong ka skul kiba la mad ïa katei ka apot sepsngi.
U Sangma ha kane ka sngi u la ïakynduh ïa ki bor pynïaid jong ka skul ba kynthup ïa ka Principal, Kong C. Allya lem bad ki dkhot ka Managing Committee (MC) bad kular ruh ba ka Sorkar kan ïaleh katba lah ban ïarap bad ai jingkyrshan ïa ki khnang ban tei pynbha biang ïa ka skul kumba ka long.
“Kane ka dei ka jingjia ba sngewsih. Ka dei ruh ka skul kaba la rim bha bad ka long ka jingduhnong kaba khraw ïa ki khynnah, ka skul, ka balang bad ka imlang-sahlang hi baroh kawei,” la ong u Myntri Rangbah haba kren sha ki lad pathai khubor.
U la kdew ruh ba ki don bun bah ki ‘riew pawkhmat kiba kane ka skul ka la saiñdur, bad ban ïohi ïa ka ha kane ka rukom, ka long kaba isangsot bad kaba sngewkyndit.
“Ngi la ïakynduh ïa ka Principal lem bad kiwei-kiwei ki dkhot ka M.C., ki nonghikai bad ngi la kular sha ki ba kum ka Sorkar bad ka imlang-sahlang ngi don ryngkat bad ki bad ngin pyntikna ba ngin ïatreilang ban tei biang ïa kane ka skul,” u la ong.
Na ka liang u Myntri Rangbah lyngba ka Chief Minister’s Special Development Fund (CMSDF), u la kular ruh ban pyllait T.1 klur sha ka skul bad ynda la ïoh lut ïa ki jingkheiñ baroh, yn sa pyrkhat kumno ban pynbiang ïa ka jingïarap pisa khnang ban pyntikna ba kane ka skul kan long biang kumba ju long.
“Hooid, lehse ngim lah ban pynwandur biang ïa ka kumjuh kumba ka long namar ka dei kaba la rim bha, hynrei nga ngeit ba ka M.C. kan sa rai kumno ban ïaid shakhmat bad kane ka kam. Hynrei kumba nga la ong, nga wan hangne ban pyni ïa ka jingïadon ryngkat jong nga bad ka skul, ki khynnah, ka M.C. bad ka imlang-sahlang baroh kawei,” u la ong.
Shuh shuh u la bynrap, “Nga dang ong ïa ki ba ki dei ban lum ïa ki kot ki sla kiba dang ïoh. Hynrei ka kam kan sdang noh mar-mar, ngin sa phah pisa noh sha ki bad ka M.C. kan sa shim rai kumno ban ïaid shakhmat…kin peit la ki kwah ba pynwandur biang kum kaba rim ne ban pynkylla noh, kata ka shong ha ki.”
Ha kane ka sngi, u Myntri Sorkar Jylla, Bah A.L. Hek u la wan poi lang ha katei ka skul.
