Karachi, Jymmang:
Katkum ka khubor ba lah pynbna da ka Pakistan Hockey Federation (PHF) ka long ba u nongpyniaid jong ka kynhun ialehkai Hockey jong katei ka ri u Siegfried Aikman u lah soi ia ka shithi iehnohkam hadien ba u lah pynpaw ba ym shym la ioh satia ia ka jingsiew ha ki 12 bnai ba la dep.
Shuh shuh ka khubor ka iathuh ruh ba u Aikman uba lah pyniasoh bad katei ka kynhun ialehkai dang ha u snem ba lah leit noh, lyngba ki rynsan pathai u shim ia katei ka lad ka lynti ban pynbna ia katei ka jingpynbna paidbah ha kaba iadei bad katei ka bynta. Wat la u Aikman u lah leitphai iing na ka ri Pakistan ha u snem ba la dep halor katei ka juh ka jingeh kaba u iakynduh ha katei ka kynhun ialehkai ka ri, pynban u la pynpaw pat ia ka jingkwah jong u ia katei ka kyrdan ba u don kaba u iaiap na ka bynta ban ioh ruh wat ka Arrear, hynrei kam shym la don kano kano ka khubor ba seisoh ka ban mih na katei ka bynta bad uba lah hap ban shim ia katei ka sienjam ban iehnoh syndon ia ka kam.
Ha ki katto katne ki por, u Aikman u lah dep ruh ban phah ia ka shithi iehnohkam sha ka Pakistan Hockey Federation (PHF), ha kaba uwei pat u nongpyniaid na ka ri Netherlands u Roelant Oltmans u lah poi ha ka ri Pakistan bad u ban sa leitlang ruh ba ka kynhun ialehkai Junior jong ka tei ka ri sha Muscat na ka bynta ka Asia Junior Cup.
Shuh shuh ruh na ka liang jong ka PHF ka pynthikna ruh ba u Oltmans u lah poi ha Lahore bad u ban shimti ia ka kam kum u nongialam jong katei ka kynhun ialehkai na ka bynta katei ka lympung ialehkai ka ban long. Hynrei katei ka synjuk kam shym la pynpaw satia ne kren shai mano ban siew ia ka jingsiew sha u ne wat ban pynkhuid noh ia ka jingsiew kaba dangsah jong u Aikman. Kumba ka paw mynta, u Aikman u lah shimwai ha ka PHF hadien ba ka Pakistan Sports Board (PSB) ka lah pynpaw ba kan siew ia ka tulop sha utei u nongpyniaid. Kumta ka jingiakhu hapdeng ka PHF & PSB halor ka Ilekshon bad ki jingeh kiba iakynduh ha kaba iadei bad ka riti treikam ka lah wanrah sha ka jingialeh ha kaba shnat treikam jong ka jylla ka lah sangeh noh ha ka ban bei pisa sha ka PHF.
