Ka jingjia ka bym ju kham jia koit, kiba bun ki la pynpaw ïa ka jingbym shaniah hadien ba ki pulit ki la pynbna ba ki la kem ïa san ngut ki briew kiba la donkti ban shoh ïa ar ngut ha Khyndailad. Ha ka miet jong ka Sngi Palei, ar ngut ki samla ki la shah shoh bad ha ka sngi kaba bud, ki pulit ki la pyntip ba da ka jingïarap ki pulit Guwahati, la ïoh kem ïa kita ki san ngut na sor Guwahati, Assam. Ki pulit ki khlem pynbna ïa ki kyrteng jong kita ki san ngut bad ha kajuh ka por, la buhrieh ïa ki durkhmat jong ki.
Kane ka jingbuhrieh ka la pynsuba sniew pynban ïa kiba bun ba lang. Lehse ki pulit ki khlem kwah ban nang pynheh thma ïa kaei kaba la jia bad namarkata, ki khlem pynpaw dur lane kyrteng jong kiba la shah kem. Hynrei kane ka jingleh ka la pynlong pynban ïa shi kynhun ki nongñiah kali kamai ba kin leit tur sha ka thanat Sadar ha ka Sngi Saitjaiñ ban dawa na ki pulit ba kin da pynshisha halor ka jingkem ïa kita ki san ngut. Kaba kum kane, kam pat ju kham jia koit ha Meghalaya haduh ba kin da don ki ban leit tur shaduh thanat ban dawa ïa ki jingshisha. Ynda ki katto katne ngut ki la wanphai na shapoh ka thanat Sadar hadien ka jingïakynduh ïa ki heh pulit, ka la mih ka jingpynbna ba ka long kaba shisha ba ki pulit ki la kem ïa kita ki san ngut.
Ha kiba bun ki khep, ki paidbah ki shaniah beit lada ki pulit ki pyntip ba ki kem ïano-ïano ha kaba ïadei bad ki kam be-aiñ. Ka long ruh ka jinglehraiñ ïa ka tnat pulit baroh kawei haba ka ïakynduh ïa kiba kum kine ki khep. Tangba ngim dei ban sngewphylla than haba ki pulit ki duh jingshaniah naba wat ka Meghalaya High Court kaba don ha Shillong ka la pynpaw ba ka kwah da ki pulit ka Sorkar Pdeng ban peitngor ïa ki trok kiba kit dewïong be-aiñ? Kat ka High Court kan phah wan da ki pulit Sorkar Pdeng watla ki pulit jong ka jylla ki don? Lada ym dei ba ka la duh jingshaniah, ngim tharai ba kat ka High Court kan pan da ki pulit kiba na shabar. Haba ka long ha kane ka dur, ka dei ka kamram jong ki pulit ban ïaleh katba lah ban ïoh biang ïa ka jingshaniah jong ki paidbah. Ka long kaba ma shibun lada ki paidbah ki duh jingshaniah ha ki briew kiba dei ban pyntreikam ïa ka aiñ. Kam dei ka kamram jong ki paidbah ban leit kyrpad ïa ki pulit ba kin trei ha kata ka dur ba ki paidbah kin lah ban shaniah. Ma ngi ki paidbah ngi shu peit ha kano ka rukom ki pulit ki treikam bad ngi sa ai ïa la ka jong ka rai. Ki kam ki kren kham jam ban ïa ka ktien!
Ki pulit kim lah ban kynnoh ïa ki paidbah lada kim ïoh jingshaniah namar kin hap ban peit shwa ïa ka jingleh lajong. Lada tang uwei ne ar ngut ki pulit kiba leh ïa ki kam kiba pynduh jingshaniah, ka tnat pulit baroh kawei ka duh lut ïa ka jingshaniah jong ki paidbah. Kaba kum kata ka tnat pulit ruh ka long kaba ma ïa ka imlang-sahlang namar ki pulit ki mih na kajuh ka imlang-sahlang bad kim dei kiba wan na kawei pat. Lada ka tnat pulit ka pynlong da ka sorjamin la ka ïoh ne ka duh jingshaniah na ki paidbah, ngi tharai ba 90 na ka 100 kin ong beit ba kim shaniah satia. Ngim da donkam ban ïa pynshisha than halor kane namar ngi tang shu pule na ki jingkynthoh ka High Court, ngi la sngewthuh shai ka tnat pulit jong kane ka jylla ka long kumno bad ka treikam kumno. Ka High Court kan ym kynthoh kulmar khlem da tip ïa ki jingshisha. Bad ngi da sngewïahap ruh bad ki jingkynthoh jong ka High Court namar ka long kaba don nongrim bad kaba shisha.
Ka jingduh jingshaniah jong ki pulit kan bteng lada ka tnat hi kam pat lah ban pynkylla ïa ka rukom treikam jong ka bad ka jingpynïadei bad ki ‘riew paidbah. Ki don ki heh pulit kiba nang bha ban pynïadei bad ki ‘riew paidbah namar ki sngewthuh ba khlem ka jingïatreilang jong ki nongshong shnong, yn ym lah ban thaw pyrthei eiei khamtam ban teh lakam ïa ki kam sniew kum u drok. Lada ki pulit ki duh noh ïa ka jingïatreilang jong ki paidbah, ka shongsuk shongsaiñ ruh kan long kaba synjor bha bad ka lah ban pynmih ïa kiba bun ki jingeh.
Ki pulit lada ki kwah shisha ba ki paidbah kin ïatreilang bad ki, ki dei ban pynkylla dur shwa ïa ka tnat baroh kawei. Ha ki jaka ba ki pulit kin hap ban pynïadei bha bad ki paidbah, ka tnat ka dei ban jied bha. Kam dei ban phah da ki pulit ki bym nang wat tang ban kren ïa ki ‘riew paidbah namar kan pynsniew dur shuh-shuh ïa ka tnat pulit nalor ba ka la sniew lypa. Ka shong sa ha ka tnat pulit kumno kan treikam nangne shakhmat hadien ba ka la ïohi kumno kiba bun ba lang ki la duh jingshaniah haduh ba la shah buh jingkylli la ka jingkem briew ka long kaba shisha ne kaba lamler.
