Shillong, Jymmang 21:
Ka pung Umïam katba nang mih ki sngi ka la sdang ban rngat namar ka jingduna hap slap kat haduh ba la pynlong ïa kane ka pung ban paw ka surok rim bad ki jaka shongkai kiba la tei naduh ki por kiba mynshwa.
Na ka jingpaw ki maw bad surok kiba don ha katei ka pung ka la pynlong ïa ki briew kiba napoh ka jylla bad na kiwei ki jylla kiba wan kai sha Damsite ban leit ïuh-kjat sngewtynnad shaduh ba kut jong katei ka pung.
Ka long shisha kaba phylla ba kane ka surok rim kaba la tei naduh ki por mynshwa kat haduh mynta ka rong ka dang neh sah, wat la ym don ba maramot shuh namar ba la tam da ka um.
Na ka jingrngat jong katei ka pung ka la pynlong ïa ka sorkar ban don hapdeng ka jingkhuslai mynsiem namar kam lah shuh ban pynbiang bording ïa ki paidbah ka jylla.
Haba ïakren bad uwei na kiba pynïaid ïa ki motorboat, u la ïathuh ba u la don haduh khat-hynriew snem ha katei ka kam. U la ïathuh ruh ba ki briew kiba wan kai pyngngad ki kwah ban shongkai. Hynrei mynta u snem ka jingrngat ka um ka la kham bun bha haba ïanujor bad kiwei ki snem.
Nangta, u la ïathuh ha ki por kham mynshwa ka la ju don ba ka la rngat kumne, hynrei ha kine ki snem kam ju rngat shuh kham bun kumne. Pynban mynta u snem ka la rngat haduh ban da paw ka surok rim bad paw ki jaka shongkai pyngnad kaba la tei naduh ki por mynshwa.
Nalor kata, u la ïathuh ba ha kine ki snem lada ym slap, ym pat da ïohi than ïa kine ki jaka shongkai ki briew ba kin paw, hynrei mynta u snem ki la paw.
Shuh shuh u la ïathuh ba lada duna um ha Damsite kiba ñiah motorboat ki hap ïaid napdeng namar da ïaid kham na kyndong ki ïatyngkhuh maw.
Namar kata, u la pynpaw ba lada ym slap ha kine ki taïew ban wan, ka damsite kan nang tyrkhong bad ka jingpynlip bording hapoh ka jylla ruh ka dang jur.
Nalor kane, u la pyntip ba ka damsite ka ju dap um ka dei ynda la poi u bnai Jylliew bad ka sdang tyrkhong mar shu sdang u bnai Ïaïong.
La ïohi ruh ba ki nongshangkai pyrthei na kiwei ki jylla ki la kham bun bha mynta por pyrem namar ka jingpyngnad ka lyer ba wan na damsite.
