Chennai, Jymmang:
Ha ka jingialang jong ka ‘Board of Directors’ ka International Boxing Association (IBA), ka khubor ba mih na katei ka jingialang ka pynbna paidbah ba ka Women’s World Boxing Championships 2024 la pynbeit ban pynlong ha Astana, Kazakhstan.
Kumta na ka liang jong u Vice President ka International Relations u Aziz Kozhambetov na ka Kazakhstan Boxing Federation u lah phah ia ka jingtyrwa ka jong u ha ka jingialang bad u soh ba lah mih na ka u long ba ka Astana ka lah shah jied mynta na ka bynta ban pynlong ia katei ka lympung ialehkai ha u snem ban wan ha Barys Arena. Shuh shuh ka khubor ka iathuh ruh ba ka khusnam song pisa na ka bynta katei ka lympung, lah pynkhreh ruh mynta ba kan long arshah ha kaba ka nongiakura ba ioh khur ia ka kyrdan ba nyng-kong kan khur ruh ia ka song pisa kaba haduh $200,000 USD. Na ka liang jong u nongpyniaid bahakhliehduh jong ka IBA u Umar Kemlev u iathuh ba u dap da ka jingkmen kaba khraw ha kaba lah ioh ban pynkhamti mynta sha katei ka ri ban pynlong ia ka lympung ialehkai kaba long ruh kawei na ki lympung iakura ba heh tam ka IBA.
Kumba ka paw mynta ka long ba katei ka lympung ialehkai lah dep ban pynlong ha u snem 2016 ha Astana bad mynta kaba lah leitphai biang sha ka tei kajuh ka ri ha ryngkat bad ka jingnang iai pynbun shuh shuh ka song pisa, ha kaba ki nongialehkai ba wan ba sha ki kyrdan ba shakhmat kin ioh ban khung shalade ia ka song pisa kaba haduh $200,000 USD bad ha kaba baroh ka khusnam song pisa ka long $4.8 million USD na ka bynta baroh ki 12 kyrdan ialehkai. Shuh shuh ruh katei ka song pisa ka kynthup ruh ia ka 10% kaba leit sha ki nongpyniaid bahakhliehduh jong ki kynhun ialehkai.
Na ka liang jong ka Board of Directors ka lah shim ruh ia ka rai ha kaba iadei bad kawei pa t ka jingialang kaba heh ka ban sa long ha u bnai Naitung mynta u snem ha Phuket, Thailand.
