Scotland, Jymmang:
Na ka liang jong ka Cricket Scotland (CS) ka pynbna khubor ia ka jingpyllait ia ka thup kyrteng jong 15 ngut ki rang-ialehkai Kriket jong ka kynhun ialehkai na Scotland na ka bynta ka rynsan qualifier jong ka ICC Men’s World Cup ka ban sa long ha Zimbabwe naduh ka 18 tarik u bnai ban wan.
Kumba ka paw mynta ka long ba ka Scotland ka lah ialeh mynta ban dang iai pynneh pynsah ia ki juh ki rangialehkai ba tbit kiba lah kyntiew ia ka kynhun ialehkai baroh kawei ban rah ia ka trophy jingjop ha ka ICC Cricket World Cup League 2 ha u bnai Rymphang. Shuh shuh ruh katei ka kynhun ialehkai ka lah pynlong ruh ia ka jingkylliang rangialehkai ha ka kynhun haduh arngut kata kiba lah dep ban ialehkai ha Nepal kata u Alasdair Evans bad Adrian Neill da kaba wanphai a ha ka jingshah pynmih bujli ha jaka u Liam Naylor bad Kyle Coetzer. Kumjuh ruh u Evans u long uwei na ki 14 ngut ki rangialehkai uba lah don ha ka jingiateh kontrak na ka bynta ka aiom ialehkai 2023-2024 uba mynta u don ha u lain na ka bynta ka jingialehkai ODIs ba nyngkong naduh u snem 2021.
Nalor kata, ha katei ka kynhun ialehkai ka don ruh ia ka jingkyrmen ba kan lah ban pynwandur shuh shuh ia ka rukom ialehkai jong ka mynta na League 2 sha katei ka rynsan iakhun ka ban wan; ha kaba ka kynhun ka dang iai iakhun bad ki khyndai kiew pat ki kynhun ialehkai na ka bynta ki ar jaka ba shakhmat ha ka Cricket World Cup ka ban sa long mynta u snem. Kumjuh ruh kiba wan sha ki san kyrdan ba shapoh na ka Super League kata ka West Indies, Sri Lanka, Ireland, Zimbabwe bad Netherlands kin iasohlang bad ki lai kynhun ialehkai ba shakhmat jong ka League 2 kata ka Scotland, Oman bad Nepal bad kumjuh ruh ki finalist jong ka Play-off kata ka United States bad UAE ba kin shimbynta ha katei ka rynsan ialehkai ka ban sa long ha Zimbabwe.
Ka kynhun ialehkai jong ka Scotland na ka bynta ba kin ia aireng ha katei ka rynsan iakhun ki long:
Richie Berrington (C), Matthew Cross, Alasdair Evans, Chris Greaves, Jack Jarvis, Michael Leask, Tom Mackintosh, Chris McBride, Brandon McMullen, George Munsey, Adrian Neill, Safyaan Sharif, Chris Sole, Hamza Tahir, Mark Watt.
