Itanagar, Jymmang:
Ki nongïalam jong ka Arunachal Pradesh Youth Congress (APYC) ha ki khyndiat sngi kiba la leit noh ki la pynpaw ïa ka jingpyrshah bad jingpynrem kaba jur ïa ka sorkar jylla kaba la donkti ban kem ïa 35 ngut ki briew bad pynngat ruh ïa ki hapoh ki kyndon jong ka Arunachal Pradesh Unlawful Activities (Prevention) Act (APUAA). Ki 35 ngut kiba la shah kem ki dei ki nongkyrshan kiba la ïashim bynta ha ka jingkhot pakhang shnong kaba 72 kynta ba la pynlong da ki seng trei kam bapher bapher jong ka jylla Arunachal Pradesh.
Ïa katei ka pakhang shnong la pynlong kum ka dak ban pynpaw ïa ka jingpyrshah halor ka jingjia lait tuh jong ki jingkylli eksam kam ba la pynlong da ka Arunachal Pradesh Public Service Commission. La pynkut ïa katei ka pakhang shnong ha ka 12 tarik mynta u bnai.
Ha ka jingïalang bad ki lad pathai khubor, na ka liang u President jong ka APYC – Tarh Johny u la pyntip ba ki bor sorkar ki la kem ïa kitei ki 35 ngut ki briew khlem da don ïa kano kano ka nongrim kaba skhem. Na ka liang u Tarh u la buh jingkylli ruh ïa ka sorkar jylla ba balei ka la leit ban kem ïa kitei ki 35 ngut watla ïa ka jingïakhih bad pakhang shnong la pynlong ha ka rukom kaba suk kaba saiñ.
Na ka liang u nongïalam ka APYC u la pyntip ruh ba ki bor sorkar ki la donkti ruh ban pynthut ïa ka shong suk shong saiñ jong ki bahaïing jong kito kiba la shah kem. U la kynthoh ruh ba lada ki paidbah ki la don bynta ban ïakhun na ka bynta ban wanrah ïa ka jingkylla ha ka imlang ka sahlang, balei pat ba ki bor pulit ki la donkti ha ki kam ban thombor pyrshah ïa ki paidbah ba lui lui jong ka jylla.
U la kynnoh ruh ba ka sorkar jylla ka la shim da ki lad ki lynti ban wanrah ïa ka rukom synshar donbor ïa ki riew paidbah bad pyrshang ruh ban iuh roit ïa ki hok ‘fundamental’ jong ki paid nongshong shnong ka jylla. Halor katei ka mat, na ka liang ki nongïalam ka APYC ki la dawa na ka sorkar jylla ba ka dei ban pyllait noh ïa ki 35 ngut kiba la shah kem bad kumjuh ruh ban weng bad pyndam noh ïa baroh ki mokotduma ba la pynrung pyrshah ïa ki.
