Shillong, Jymmang 21:
Ka Volleyball bad ka Sport Climbing kin long sa ar tylli ki jingïalehkai kiba thymmai ki ban ïoh ïashim bynta ha ka Meghalaya Games mynta u snem ka ban long ha Tura.
Kiwei pat ki jingïalehkai kiba la ïoh ban ïashim bynta ha ka Meghalaya Games ha u snem ba la dep ha kane ka nongbah ki long ka archery, athletics, badminton, basketball, boxing, cycling, football, gymnastics, judo, karate, shooting, swimming, table tennis, lawn tennis, weightlifting, wrestling bad ka wushu.
Kane ka jingtyrwa ban pynrung ïa kitei ar tylli ki jingïalehkai ka long hadien ba ki nongmihkhmat jong ki synjuk ïalehkai kiba don hapoh ka lama jong ka Meghalaya State Olympic Association (MSOA) ha ryngkat u Myntri ka tnat ïalehkai ka Sorkar Jylla u Bah Shakliar Warjri (uba long ruh kum u ex-officio President ka MSOA) bad u Working President ka MSOA u Bah John F. Kharshiing, ki la leit jurip ïa ki jaka ïalehkai ha Tura.
Katei ka kynhun ka la leit ban jurip ïa ka Rongkhon swimming pool bad na ka liang ka Sorkar ka la mynjur ban maramot pynbha ïa ka bad kiwei ki jaka kum ka police shooting range, madan ïalehkai kriket, youth hostel, Tura Indoor Hall bad ka athletics track.
Shuh shuh ka MSOA ka la ai jingmut ba ïa ka Meghalaya Games dei ban pynlong ha kylleng ki district jong ka Jylla khnang ban lah kyntiew ïa ki jaka ïalehkaiï.
“Ïa ka Meghalaya Games la pynkhie im biang ha u snem 2019 hadien ki 16 tylli ki snem ba ym shym la lah shuh ban pynlong. Kumta u 2020 la lah ban bteng biang ïa ka. Ngi la ïamir jingmut lang bad ki bor sorkar ba ïa kane ka lympung ïalehkai dei ban pynlong ha kylleng ki district khnang ban kyntiew ha ka jingdon ïa ki jaka ïalehkai. Da kaba pynlong ïa kum kane ka lympung, ka sorkar jylla kan ïaleh ban pynbiang ïa ki tiar ki tar bad ki jaka ïalehkai kiba paka khnang ba ki khynnah samla kin ïoh ban ïashim bynta ha ki jingïalehkai bapher bapher,” la ong u Bah Kharshiing.
Kumba ka paw, ïa ka Meghalaya Games la pynlong tang ha ka nongbah Shillong, hynrei mynta u snem yn pynlong ha Tura bad ha u snem ban wan yn pynlong sa ha Jowai.
