Paris, Jymmang:
Ki bor pyniaid ka Iran ha ka Sngi Thohdieng, ki la sdien phasi ia 3 ngut ki briew halor ka jingdonkti ban thombor bad pyniap ia ki dkhot jong ka tnat pahara hapdeng ka jingiakhih paidbah kaba la jia ha ka por ka jingkhlad ka samla Mahsa Amini ha u snem ba la leit. Nangta la ong ba katei ka jingleh jong ka Iran ha kane ka por, ka la ioh ia ka jingpynrem na kiwei pat ki ri sepngi ha katei ka sngi.
Kitei ki lai ngut ki kynthup ia u Majid Kazemi, u Saleh Mirhashemi bad u Saeed Yaghoubi, ha kaba ki bor pyniaid jong ka Iran ki la shem ia kitei ki 3 ngut ba ki la leh pyrshah ia ka aiñ ba la buh bad ki la kynnoh ruh ba kitei ki 3 ngut ki la leh pyrshah ia u Blei, da kaba siat ia ki 3 ngut ki dkhot jong ka kynhun ki bor pahara kiba dang ap pahara bad kiba pyrshang ban pynsangeh ia ka jingiakhih paidbah jongki ha katei ka por.
Ka Iran ka la sakhi ia ka jingiakhih paidbah kaba jur tam hadien ka jingkhlad jong ka samla Amini ha ka 16 tarik u Nailur, kaba long ka samla nongshong shnong jong ka Iran hi, kaba la shah bat noh ha ki pulit namar ka jingpynkheiñ ia ki kyndon ba la buh da ki bor pyniaid haba iadei bad ka rukom riam don burom jong ki kynthei hapoh ka ri, ha kaba ki hap ban da kah bad kup jaiñ ‘hijab’ ia ka khlieh jongki shisien ba ki la mih na iing.
Hapdeng katei ka jingiakhih paidbah kaba la jur bha, ki bor pyniaid ka Iran ki la kem da ki spah ngut ki paidbah nongïakhih bad da ki spah ngut ruh kiba la khlad hapdeng ka jingiakhih.
