Shillong, Jymmang 21:
Ki ar tylli ki klob ka Shillong Premier League ki la pynpaw ïa ka jingbym sngewïahap halor ka jingwanrah ka Meghalaya Football Association (MFA) ïa ka kyndon aiñ kaba thymmai ha ka lympung ïalehkai Meghalaya State League mynta ka aïom.
Kine ki kynthup ïa ka lahduh jong ka aïom ba la dep ka Mawlai Sports Club bad ka Langsning Football Club.
Kane ka kyndon aiñ kaba thymmai ba la wanrah da ka MFA ka long ba man la kawei-pa-kawei ka klob kaba ïashim bynta ha ka MSL ka dei ban pynïalehkai ïa ar ngut ki rangïalehkai kiba hapoh 21 snem ka rta ha man la kawei-pa-kawei ka jingïalehkai. Hynrei ïa kane ka kyndon ym shym la pyntreikam ha ki lympung ïalehkai kiba la pynlong ha kylleng ki district ha u snem ba la dep bad kiba bun ki klob ki la soi beit tang da ki rangïalehkai kiba la san (senior) bad ym ki rangïalehkai kiba hapoh 21 snem ka rta.
Haba ïakren bad ki nongthoh khubor, u Coach ka Langsning u Bah Hering Shangpliang u la pynpaw ba kane ka kyndon aiñ kan dei ka jingmyntoi jongno-re-jongno namar wat ka All India Football Federation (AIFF) kam shym la pyntreikam ïa ka.
“Kam long kaba sniew eiei ïa ngi ki klob, hynrei kum ka MFA ka la dei ban ai jingtip kham hashwa khnang ba ngi ki klob ngin hap ban pynkhreh lypa namar kumba ka long ha ki league jong ka aïom ba la lah la pynïalehkai tang da ki rangïalehkai kiba la san (senior). Hynrei ban shu pynmih kynsan kynsan ïa kane ka kyndon aiñ ka long kaba eh bha ïa ngi ki klob.”
“Ka long ka jingduhnong bha ïa ka klob ka jong ngi namar ngi soi ïa ki rangïalehkai katkum ka Shillong League bad ym la don kyndon aiñ eiei. Ha ka khyllipmat ba khatduh ka MFA ka la shu pyntip sha ngi ban pynrung ar ngut ki ïalehkai Under-21”
“Wat la ngi la khur jingjop ïa ka Langsning, hynrei ngi la ïalehkai da ka jingtlot bor namar ngim lah ban pynmih bujli lada la thait ki rangïalehkai Under-21,” la ong u Coach ka Mawlai, Bah Khlaiñ Pyrkhat Syiemlieh.
“Ngi la khur ïa ka jingjop namar ka Langsning ka la pynmih da u rangapkol ba dang hapoh 21 snem ka rta.”
“Lada ka MFA ka pynlong ïa ka lympung ïalehkai Under-21, ngi ki klob ngin da shim khia ban sei ïa kynhun ïalehkai Under-21, hynrei kam shym pynlong bad wat ka AIFF ka la weng ïa kane ka Under-21 na ka Santosh Trophy, te yn ngin pyntreikam na ka bynta kaei, “la ong u Bah Hering.
Ha kaba ïadei bad ka jingpynïakap ïa ki kynhun, u Bah Hering u la ong ba ka MFA ka bakla ba ka la pynngat ïa ka Mawlai bad ka Langsning ha kajuh ka group (Shillong Zone). “Ha ka jingshisha ka la dei ban khot ïa ki klob baroh ha shwa ban pynïakap ïa ki kynhun namar ïa ki klob SPL la dei ban pynngat ha baroh saw tylli ki zone “.
“Ngam sngew lah ban sngewthuh shuh ha kano ka dur ka Tournament Committee jong ka MFA ka la pynngat lang ïa ngi ha kajuh ka group, ” la ong u Bah Syiemlieh da kaba kyntu ïa ka MFA ba ka dei ban pynbna lypa ha shwa ba kan pynmih ïa kano kano ka kyndon aiñ khnang ba kan ym ktah ïa baroh ki klob.
Ha kawei pat ka liang u Bah Hering u la pynpaw ba ka jingpynlong ïa ka MSL ka long ka jingïarap kaba khraw ha ka ban jied ïa ki rangïalehkai ki ban mihkhmat ïa ka Jylla ha ki lympung ïalehkai shabar jylla.
“Lyngba ka MSL ka long ka jingïarap kaba khraw ïa ka Senior Cell jong ka MFA ba kan jied ïa ki rangïalehkai na kylleng ki district.”
