Jowai, Jymmang 21:
U MLA ka Jowai u Wailadmiki Shylla uba dei ruh u Chairman ka Meghalaya Urban Development Authority (MUDA) u la plie paidbah ïa ka ‘1st Floor building’ ne ka mala kaba nyngkong jong ka ïing treikam ka Jowai Municipal Board (JMB) ha ka jingïalang kaba la long ha Hall ka JMB ha ka Sngi Thohdieng.
Ïa kane mala banyngkong la tei hapoh ka Grand-in-aid (Creation of Capital Asset) jong u snem 2021-2022 ha ka jinglut kaba T.55 lak U Bah Wailadmiki Shylla ha ka jingkren u la ong ba ha ki snem kiba la leit, la ïohi ba ka JMB ka long kum kata ka ïing ka bym treikam shuh, na ka daw kiba bun ki jingeh kynthup naduh ka jingbym don ïa u Chairman, ka jingbym ïoh tulop tista ki nongtrei, ka jingthut ki kali kit ñiut bad kiwei-kiwei ki jingeh hynrei dei hadien ka jingshimti jong u ha u snem 2018, u la buddien ïa ki jingeh bad wad ki lad ki lynti kumno ban pynim ne pyntreikam ïa ka JMB.
U la ong ba mynta ka JMB, ka la kham kiew ka rukom treikam bad mynta ka kynti da ka jingpynïar ïa ka ïing treikam kan pynsuk khamtam ïa ki nongtrei bad pynjan shuh shuh ïa ka synshar khaddar sha ki nongshong shnong.
Ha kaba ïadei bad ka jaka bret ñiut, u la pyntip ba shen ka Jowai kan sa ïoh ïa ka jaka bret ñiut kaba paka bad kane kan urlong lyngba ka jingïatreilang ka ophis JMB, ki Waheh shnong, ki nongshong shnong, ki sengbhalang bad kiwei-kiwei.
U Chairman ka JMB, u Bah Lasooki Lakiang u la ïathuh ïa ki skhim bapher-bapher ka JMB ban ïarap ïa ki nongshong shnong jong ka nongbah Jowai bad kumba long mynta ka JMB ka don ïa ka skhim shna paiñkhana kaba la mang T.12 hajar tyngka shi longïing bad kyntu ban shim kabu ïa kane ka skhim.
Ïa ka jingïalang la pynïaid da ka Chief Executive Officer (CEO), Jowai Municipal Board, ka Kong D.V. Lyngdoh ha ka jingdonlang ki MDC ka JHADC kiba kynthup ïa u Bah Evening Teron, u Bah Ailad Bhoi, u Bah Octomewot Lamin bad ki Waheh na ki shnong bapher ka sor Jowai bad ki nongtrei ka JMB.
