Jowai, Jymmang 21:
Da ka jingthmu ban wanrah biang ïa ka shongsuk shongsaiñ ha ki shnong ki thaw kiba dang hap hapoh ka jingïakajia pud bad ka Assam, u MDC ka Barato-Mukroh konstitwensi, u Bah Aiborlang Shadap ha ka Sngi Saitjaiñ u la khot ïa ka jingkynduhlang jong ki nongïalam shnong bapher-bapher ha Hall jong ka Chaphrang Ïong-i Sports Club, Barato.
Kum ka dak ka jingburom ïa ka jingshimkhia jong u MDC ka Barato-Mukroh konstitwensi, da ki phew ngut ki Waheh Shnong bad nongkitkam shnong jong ki shnong bapher-bapher ki la wan ïashim bynta lang ha katei ka jingïalang.
Ha kane ka jingïalang la thaw noh ïa kawei ka seng treikam kaba thymmai ban peit ban khmih ïa ka khia ka shon jong ki nongshong shnong ha ki jaka ïakajia.
La jer kyrteng ïa kane ka seng ba thymmai kum ka Namdong Block & Laskeiñ Block Border Area Peace Committee (NBLBBAPC) halor ka nongrim ba ki shnong ki thaw jong ki Pnar kiba don mynta ha ka jingïakajia ki long markhap bad ka Namdong Block bad ka Laskeiñ Block.
La pynkhamti ïa u Bah Aiborlang kum u President jong katei ka seng, u Waheh Shnong ka shnong Khanduli kum u Vice-President, katba ïa uwei u nongïasaid aiñ, u Bah Fivestar Suiam la pynkhamti kum u General Secretary.
Ïa u Bah Founderson Syngkon uba long u nongïalam paidbah ka thaiñ, la ai ïa ka jingkitkhlieh kum u Assistant General Secretary bad la jied ïa baroh ki Waheh Shnong bad ki Secretary Shnong kum ki Executive Member.
Ka thong kaba nyngkong eh jong katei ka seng ka dei ban wanrah biang ïa ka shongsuk shongsaiñ ha ki thaiñ Khanduli bad Block-I haba ki nongïalam jong ka seng kin pyrshang ïakren bad ki nongïalam sengbhalang bad Waheh Shnong ki Karbi lyngba ka ‘phone’ halor ka jingdonkam ban pynlong noh da ka jingïalang ïasuk hapdeng ki Pnar bad ki Karbi.
Kumba long mynta, ki nongshong shnong ka shnong Khanduli kim ïoh rep ïoh riang la shi bnai tam namar ka jingïakynad hapdeng ki Karbi bad Pnar hadien ka jingwan sieh ïa ka khyrdop khrong khajna da ka Karbi Anglong Autonomous Council (KAAC).
Shuh shuh ki Pnar kiba sah ha thaiñ Block-I ki la shah khang ha ki Karbi ban rung sha ki shnong Karbi bad sha Meghalaya na ka daw ka jingkynnoh ba ki Pnar ki shoh pynmynsaw ïa uwei u Karbi.
Ki nongïalam shnong na Block-I ki la ong na ka por sha ka por ba ki ju pyrshang ban ïakren bad ka Sorkar Jylla ha kaba ïadei bad ka jingeh jong ki bad ka jingtlot jong ka Sorkar Jylla ban sngap ïa ka jingeh jong ki ka ju wan ka jingpyrkhat ïoh lehse ka Sorkar Jylla kam kheiñ ïa ki kum kita ki trai shnong ne nongshong shnong ba pura jong ka Meghalaya.
