Shillong, Jymmang 21:
Ka jingjia ba sngewsih ka la wan ban lynshop ha ka step Sngi U Blei hadien ba ka ding kaba klang ka la bam duh bad pyningkhong lut khait ïa ka Khasi Jaiñtia Presbyterian Girls’ Higher Secondary School (KJPG-HSS) kaba don ha Mission Compound, Shillong.
Ka KJPGHSS, kawei na ki skul kaba la rim bha hapoh ka Jylla kaba la seng ha u snem 1892 ka la dap 131 snem.
Katkum ka jingtip ba ïoh lum, katei ka jingjia ka la jia hadien ka 2 baje mynstep, kaba dei ruh ka por ba dang treikam ka jingpynlip bording ha kylleng ka nongbah.
“Ngi la ïoh jingtip ha ka por 2:35 baje mynstep. Ha kata ka por, ngi dang don sha Langkyrding namar ka don kawei pat ka jingpluh ding. Mar-mar la phah ïa 4 tylli ki kali pynlip ding bad hadien kane, la wan shuh sa 4 tylli ban ïarap lang ïa ki,” la ong uwei u pulit ka tnad pynlip ding uba don ha katei ka jaka.
U la ïathuh ruh ba ha ka por ba wan poi ha phyllaw jong katei ka skul, ka ding ka la klang bad khlem da pynslem, la sdang ïa ka jingsynreit um na ki 3 bynta.
Ha kajuh por, u la ïathuh ba hadien 1 kynta jong ka jingïakhun, la lah ban tem ïa ka ding watla ka la shim por bun kynta haduh ban da lah ban pynlip syndon ïa ka.
Haba kylli, u la ong ba ym lah ban tip satia ïa ka daw jong ka jingpluh bad ïa kane yn sa lah ban pyntikna ynda la pyndep ïa ka jingtohkit.
Katei ka bynta jong ka skul kaba la ing ka dei jong ka ïing skul barim (Old Building) bad ka kynthup naduh klas VI haduh X. Kane ka bynta jong ka skul ka dei ruh kaba la shna da ka dieng.
Nalor kane, kiwei ki kamra kiba la shah ktah na kane ka jingpluh ki kynthup ïa ka kamra ka Principal, Vice-Principal, ophis jong ka skul, jaka buh tiar, Hall, jaka shong ki nonghikai bad 2 tylli ki jaka khreh bam.
Ha kawei ka liang, ka Vice-Principal ka skul, Kong E.L. Tiewsoh ka la ong ba katei ka bynta jong ka ïing skul ka dei kaba la rim bha naduh ki por phareng.
“Ki tiar ba la julor ki kynthup ïa ka ‘Safe’, pisa, ki kot donkam jong ka skul, ki jaka shong ki khynnah, komputor, ka jingtem ‘piano’ nalor kiwei-kiwei,” ka la ong.
Ka la ïathuh ba ki bynta jong ka skul kiba lait na ka jing-ing ki kynthup ïa ka tnad pule Lower Primary, Higher Secondary, Morning Section bad ka jaka sah ki khynnah (Hostel).
“Ka jia hadien ka 2 baje ha ka por ba baroh ngi dang ïa ïohthiah lut. Ngim tip na ka daw aïu khamtam namar ka dei ka por ba lip bording,” la ong ka Kong Tiewsoh.
Ka la ong ba ki bor pynïaid skul ki la rai ban pynsangeh pynlong skul shuwa shipor bad kin sa shong ruh ïa ka jingïalang ban ïa pyrkhat kaei kaba dei ban leh halor kane ka bynta.
Ha kajuh ka por, ka Principal ka skul, Kong C. Allya ka la ong ba kum ki nongpynïaid kin ïatreilang bad kin ïaleh katba lah ban ym pynthut ïa ka jingpule jong ki khynnah.
Shuh shuh ka la bynrap, “Ngin ym duh jingkyrmen bad ha ryngkat ka M.C., ki nonghikai, nongtrei, khynnah, kmie ki kpa ngin ïatreilang bad ngi tikna ba ki kam kin ïaid shakhmat.”
Ha katei ka jingjia, ym shym la don mano-mano ba mynsaw.
