Jowai/Khliehriat 21:
Ki ar tylli ki shlem treikam jong ki District Sports Officer, West Jaiñtia Hills District bad East Jaiñtia Hills District ki la khot bad wer ïa baroh ki skul ba don ha district ban wan ïashim bynta ha ka District Level Subroto Mukherjee Cup Football Tournament ka ban sdang ha taïew balai jong u bnai Jylliew mynta u snem.
Ha West Jaiñtia Hills ïa kane ka lympung yn pynlong ha madan Kiang Nangbah Stadium, Jowai, katba ha East Jaiñtia Hills yn pynlong ha madan Dkhiah West.
Ki kyrdan ïalehkai ha kane ka lympung ki long ka Under-14 jong ki khynnah shynrang, katba ka Under-17 ka long na ka bynta ki khynnah kynthei bad shynrang.
Na bynta ka West Jaiñtia ïa ki ‘entry form’ lah ban ïoh na ka shlem treikam u DSO ha ka por long trei, da kaba pynpoi kloi ïa ki kyrteng jong ki khynnah ïalehkai ryngkat ki dur (passport size), ki syrnod sngi kha ba la ïoh na ka Municipal Board/CHC/PHC bad Aadhaar Card shwa ka 7 tarik u Jylliew.
Ïa ka jingjurip rta yn pynlong ha ka 7 tarik Jylliew naduh ka por 9 baje mynstep ha Kiang Nangbah Indoor Stadium, Jowai bad yn shah tang 25 ngut ki khynnah ïalehkai na man la kitei ki kyrdan.
Ka jingot snem na bynta ka Under–14 (Boys) ki dei ban long kiba kha hadien ka 1 tarik u Kyllalyngkot, 2010. Ka Under– 17 (Boys) hadien ka 1 tarik u Kyllalyngkot, 2007 bad Under– 17 (Girls) hadien ka 1 tarik u Kyllalyngkot, 2006.
Katba ha East Jaiñtia Hills District ïa ki ‘entry from’ lah ban ïoh na ka shlem treikam jong ka DSO, ha Dkhiah Indoor hall ha ka por long trei. Ka tarik ba khatduh ban pynpoi ïa ki ‘form’ ka long ha ka 6 tarik u Jylliew. La shah ban ai kyrteng tang 18 ngut ki khynnah ïalehkai na kawei ka skul.
Ka jingot snem na ka bynta ki Under-14 Boys ki dei ban long kiba kha ha lane shwa ka 1 tarik Kyllalyngkot 2010, ka Under -17 Boys bad Girls ki dei ban long kiba kha ha lane shwa ka 1 tarik u Kyllalyngkot, 2007.
