Shillong, Jymmang 21:
U Bah Kansing Lynshiang, kyrtong ka NPP na Mawkynrew konstitwensi ha kane ka ilekshon ba dang shu dep um kwah ban kren eiei halor ka jingpynïasoh u Bah Banteidor Lyngdoh uba dei u MLA katei ka konstitwensi sha ka NPP.
Haba u nongthoh khubor u la pyrshang ban ïakren bad u Bah Kansing, um kwah ban ong eiei namar ma u ruh u dang don lang ha ka seng NPP.
Wat la u Bah Banteidor u la rung sha ka seng NPP, hynrei u Bah Kansing un nym mih na katei ka seng namar u dang shu dep ïakhun ïa ka ilekshon MLA bad u khlem poi ruh sha ka thong.
Kum ban shu pynkynmaw, u Bah Kansing haba u ïakhun na ka NPP bad u Bah Banteidor na ka PDF ka la mih jur bha ka jingkynthoh ha ka por ilekshon, hynrei mar shu kut ilekshon haba u Bah Banteidor u la ïoh jingjop u la rung noh sha ka NPP.
Ki khubor ki ïathuh ruh hadien ba ka NPP Sengkmie ka la pyndam noh ïa ka NPP Mawkynrew Block ki la pynpaw ïa ka jingbynñiaw, hynrei ki hap hun beit ïa kaei kaba ki nongïalam ki leh.
Nangta ki khubor ki ïathuh ba ka jingïai neh beit u Bah Kansing bad ka NPP ka dei namar ka jingïasngewthuh jingmut bad u Bah Prestone Tynsong bad u Conrad Sangma kiba la pdiang ïa u ban ïakhun ïa ka ilekshon MLA hadien ba ka NPP kam shym la ïoh kyrtong shuh.
Haba ïakren bad u Bah Prestone ha kine ki sngi u la pynpaw ba ka jingkren u Bah Banteidor halor ka jingkynnoh ba ka NPP ka tyrwa pisa haduh san klur tyngka kato ka dei tang ka nia ilekshon.
Ka NPP ha kane ka ilekshon ka la jop 26 ngut ki MLA bad mynta ka la kiew sha ka 28 ngut na ka jingwan pynïasoh pura ar ngut ki MLA ka PDF ha ka 6 tarik Jymmang, 2023.
