Agartala, Jymmang:
U Myntri Rangbah jong ka jylla Tripura, u Dr. Manik Saha ha ki khyndiat sngi kiba la leit noh u la pynbna ba ka sorkar jylla hapdeng ka jingïatreilang jong ka seng BJP bad IPFT kan dang bteng ban ïoh synshar ïa ka jylla Tripura sa ha ki 40-50 snem ki ban sa wan.
Haba ai jingkren ha ka jingïalang ban rakhe ïa ka lyngkhuh dap shi snem jong ka jingshimti jong u ïa ka shuki Myntri Rangbah, na ka liang u Saha u la ong ba ki paidbah nongshong shnong ka jylla ki dang shaniah tylli ïa ka sorkar BJP-IPFT, kiba la ailad ruh sa samoi ban synshar ïa ka jylla. U la pyntip ba ka sorkar jylla (BJP-IPFT) da ka jinglah ban pyntrei janai ïa ki kam pynroi ha Tripura, kan dang lah shuh shuh ban synshar ïa ka jylla sa ha ki 40-50 snem ki ban wan.
U Saha u ba la shimti ïa ka shuki Myntri Rangbah na u Biplab Kumar Deb ha u snem u ba la dep u la ïathuh ba ka sorkar jylla hapoh ka jingïalam jong ka seng BJP ka la shim ïa ki sienjam kiba kyrpang eh na ka bynta ban wanrah ïa ka roi ka par bad ka shong suk shong saiñ ha ka jylla. U la ïathuh shuh shuh ba ha kiba bun ki khep, ka sorkar jylla ka la ïakynduh ïa ki diengpyngkiang, hynrei ka sorkar ka la lah pat ban shim ïa ki sienjam kiba kyrpang ban ïakhun pyrshah bad pynbeit ïa ki jingeh baroh.
