Shillong, Jymmang 21:
Ka Sohryngkham SC bad ka Umphyrnai SC ki la jam sha ka final ha ka lympung ïalehkai SSA Under-10 (Boys) Football League 2023 hadien ba khur ïa ka jingjop ha ka sngi Saitjaiñ.
Ha ka jingïakhun semi final kaba la long ha madan Lawmali, ka Sohryngkham SC ka la pynliem noh ïa ka Sacred Heart Football Academy da 4-0 kol. Ha kane ka jingïalehkai u Pynsandame Kharbuli u la ïoh ban thep ar kol (23 & 50), katba ïa kiwei pat la pynbud da u Damanbha Nongbet (44) bad ïa kawei pat la ïarap pynthep da u rangïalehkai ka Sacred Heart u Badondor Jana (39).
Haba phai sha kawei pat ka jingïakhun semi final kaba ar, ka PFR Academy ka la shah rem noh ha ka Umphyrnai SC da 3-0 kol. Ïa kine ki kol la thep da u Dibormy Kharkongor (2), Bankyrshanbor Kharkongor (16) bad u Wanmebantei Kharkongor (25).
Lyngba kine ki jingjop, ka Sohryngkham bad ka Umphyrnai kin pynkhreh ban ïaknieh ïa ka nam lahduh ha ka 27 tarik.
