Guwahati, Jymmang:
U Myntri Rangbah jong ka jylla Assam, u Himanta Biswa Sarma ha kane ka taiew ba mynta u la pyntip ba u Myntri ka tnat Korbar Ri jong ka Sorkar Pdeng – Amit Shah un wa san ban jngoh ïa ka jylla Assam ha ka 24 tarik mynta u bnai bad ha ka sngi kaba bud un sa leit ban ïashim bynta ha ki katto katne tylli ki jingïalang.
Ha ka jingïakren bad ki lad pathai khubor, na ka liang u Myntri Rangbah u la pyntip ba u Amit Shah un sa leit ruh ban ïashim bynta ha ka jingïalang jong ka tnat Niti Aayog meeting kaba la buh ban pynlong ha ka 27 tarik mynta u bnai.
Halor ki mat kiba ïadei ba ka rai jong ka sorkar jylla ban khang khyrdep sa ïa 300 tylli ki madrassa, na ka liang u Myntri Rangbah u la ïathuh ba ka sorkar ka la dep ban khang khyrdep ïa haduh 600 tylli ki madrassa. U la pyntip shuh shuh ba ka seng BJP ka la dep ban pynlong ïa ki jingïalang bad ki bor ba pynïaid ïa ki madrassa bad ha katei ka jingïalang la pynmih ïa ka rai ban khang khyrdep sa ïa 300 tylli ki madrassa. U la pyntip shuh shuh ba ka rai ban khang khyrdep ïa kitei ki madrassa kan shong ha ka jingïalang syllok ka ban sa pynlong hapdeng ka tnat pulit jong ka jylla bad ki kynhun Qaumi.
Halor ki mat ba ïadei bad ka rukom shong kurim bun lok lane ka ‘polygamy’ na ka liang u Myntri Rangbah u la ïathuh a kan nym don kano kano ka jingleit khynra kaba ïadei bad katei ka mat namar kam dei kaba long beaiñ kat kum ka jingngeit jong ki paid Muslim. Hynrei u la ïathuh pat ba ha ka imlang sahlang ki paid Hindu lada don kano kano ka jingshong kurim bun ngut ka sorkar kan sa shim da ki sienjam kiba donkam ban leit pynlong ïa ki jingkhynra.
