Shillong, Jymmang 22:
Ki bor ba dei khmih ka tnad Khlaw ha ryngkat ka jingsynran lang ki pulit ka East Khasi Hills District ha ka step Lah Sngi U Blei ki la leit ban pynpra ïa ki dukan kiba don ha shi lynter rud surok na Umdiengpun shaduh Pomlum.
Ki nongshong dukan kiba la pynpaw ka jingsngewsih kthang ki la ïathuh ba watla ki la ïoh jingbit na ki Rapsang ban shong dukan ha katei ka jaka, hynrei ki bor ba dei khmih ka tnad khlaw lyngba u District Forest Officer, East Khasi bad Ri-Bhoi Distrik ki la phah mih noh ïa ki na katei ka jaka namar ka hap hapoh ka Compartment No.1 jong ka Upper Shillong Protected Forest.
Ha kajuh ka por, ki la ong ba la dei ban ai por shuwa ïa ki khnang ba kin weng hi la ki dukan bad ym ban shu jynrat ïa ki da ki puh-shilum.
Ki la ong ruh ba lada ki bor Sorkar ki ñion ïa ki briew kiba sah ha Them Metor ha kane ka rukom, kin synrop lang bad ka Sorkar.
“Ngim tip na kaei ka daw, ki la dei ban ai por keiñ. Ki shu wan beit da ka bor hynne ka step ha ka por 5 baje bad pynpra beit da ka puh-shilum,” la ong kawei na kiba shong dukan ha katei ka jaka.
Ka la ong ruh ba lada ai por ban lied hi ïa ki dukan, ki dieng bad ki tin kin dang bha bad ki jin da la sepei kumba long hadien ba la dep pynpra.
“Balei kim ñion shuwa ïa kito ba sah ha Them Metor. Lada ki leh kumne ïa kito kiba ha Them Metor, ngi ruh ngin synrop lang,” ka la ong.
Ka la ong ruh ba ka la ïoh jingbit na ki Rapsang ban shna dukan ha katei ka jaka ban ïoh bylla sngi.
Haba kdew ba ki don kiba la ïoh kot haba ïadei bad ka jingai por, ka la ong ba ma ka lem bad ki katto-katne kim shym la ïoh jingmaham ba ki dukan jong ki kin shah lied.
“Ïa ki ‘Notice’ ym dei ban ai sha ngi ki nongshong dukan, dei ban ai sha u Rapsang namar ki don mukotduma bad u bad kim dei hi ruh ban wan thombor ïa ngi kumne,” la ong sa kawei ka nongshong dukan.
“U Rapsang u ong ba haba phi don ha kane ka jaka, ka jaka nga ai ma nga, phi dei ban shong beit hangne, lada ka tnad khlaw ka wan ai ‘Notice’ sha phi ruh, wat nym pynsngap, sngap ïa ngi ki trai jaka,” ka la ong.
Ka la ïathuh ruh ba kat ban da ka poi ha dukan ha shuwa ka 6 baje mynstep, ki dukan ki la pra lut ha ryngkat ki tiar ki tar kiba don hapoh jong ki.
“Donbok ba ym shym la don mano-mano ba sah ha dukan,” ka la ong.
Sa kawei pat kaba shong dukan ha katei ka jaka ka la buh jingkylli ba balei ym ktah tang ïa kita ki 8 tylli ki dukan kiba la ïoh kot, pynban la ktah lang wat ki bym ïoh jingtip kumjuh.
“Ka Sorkar ka dei ban peit ïa ki duk ki suk, ki khun ki kti ba don hapoh ka Jylla, pynban ka khñiot ïa uba don ha ka Jylla. Ha ka jingshisha la dei ban khñiot shuwa ïa kitei ki Them Metor keiñ kiba la leh shibun ki kam be-aiñ,” bynrap katei ka nongshong dukan.
