London, Jymmang:
Na ka liang jong ka International Cricket Council(ICC) ha ka jingpyllait khubor ka jong ka, ka iathuh ba ka lah pynngat mynta ha ki kyndon jingpynshitom ia u umpire na Bhatinda u Jatin Kashyap halor ka jingpynkhein ka jong u ia ki kyndon Anti-Corruption Code hadien ka jingtohkit ha kaba iadei bad ki jingialehkai shabar -ri ha u snem 2022.
Kumta na ka liang jong katei ka synjuk kam shym la pynpaw shai ha kaba iadei bad ka jingjia ka ban lam ia u Kashyap shaduh u pud jong ka jingshah pynshitom katkum ki kyndon jong ka Anti-Corruption Code. Kum u umpire ba ju iai pyntyllun ia ka kam shakri ka jong u, u Kashyap u ju iai shakri ha ka kam ha ki jingialehkai Kriket ha ka Distrik ha Punjab hynrei u bym shym la hap pat ha ka shnat umpire jong ka BCCI.
Kumta u Kashyap u lah shah pynngat ha ka jingshah pynshitom na ka jingbym shym la lah ban seisoh ka jong u ne ka jingkyntait noh khlem da ia-pein badno badno ne ka jingiadei bad jingiatreilang bad ka jingtohkit jong ka Anti-Corruption Unit’s (ACU) kaba iadei shaphang ka jinglah ban urlong kata ka Corrupt Conduct hapoh ka Code. Ka tyllong khubor na BCCI ka iathuh ruh ba ka lah wad ki lad ki lynti na ka bynta ban ioh ia ka sabut kaba biang bad ba thikna ha kaba iadei bad ki jingleh jong utei u umpire na ka Punjab Cricket Association (PCA) ha katei ka lympung ialehkai ha u bnai Risaw jong ka u snem ba lah dep.
Hynrei na ka liang jong u Secretary ka PCA u Dilsher Khanna u iathuh ba ka jingpynngat jong ka ICC ha ki kyndon jingpynshitom pyrshah ia u Kashyap kam shym la don kano kano ka jingiadei bad ki jingialehkai kiba u ju pyniaid ha ka jylla. Hynrei na ka liang jong ka ICC ka lah ai por ia u haduh 14 sngi na ka bynta ban ai ka jubab ha kaba iadei bad katei ka jngshah pynshitom ka jong u katkum ki kyndon.
