Shillong, Jymmang 22:
Ka shlem treikam u District Sports Officer (DSO), East Khasi Hills kan pynlong ïa ka lympung ïalehkai District Level Inter School Subroto Mukherjee Cup Football Tournament 2023 naduh 20 tarik u Jylliew.
Ïa kane ka lympung la phiah ha ki lai tylli ki kyrdan ïalehkai, kita ka Under-14 (Sub-Junior) tang na ka bynta ki khynnah shynrang, katba ka Under-17 (Junior) kan dei na ka bynta ki khynnah kynthei bad shynrang.
Ki khynnah ki ban ïashim bynta ha ka Sub-Junior kin dei ban long kiba la kha ha lane hadien ka 1 tarik u Kyllalyngkot, 2010. Katba ha ka Junior ki dei ban long kiba la kha ha lane hadien ka 1 tarik u Kyllalyngkot, 2007.
Kat kum ka kyrwoh ba la pyllait da u Bah O. Mawthoh (DSO) la ong ba ka tarik kaba khatduh ban pdiang ïa ki skul ba kin pynpoi ïa ki ‘form’ kan long ha ka 2 tarik u Jylliew ha ka shlem treikam u DSO bad ka jingkhmih ïa ka rta ki khynnah kan long ha ka 6 tarik. Kumta la bthah ruh ïa ki khynnah ba ki dei ban wanrah ïa ki kot ki sla ki ban pynshisha ïa ka snem kha ka jong ki.
