Shillong, Jymmang 22:
Ka la don ka jingïapher ha kaba ïadei bad ka jingkam jong ka Synjuk Ki Waheh Shnong, Jowai bad ka Jowai Municipal Board (JMB) halor katno sngi la ju wan lum ïa ki ñiut ki ñier na ki shnong ki thaw.
Kane ka la paw ha ka por ba ka Meghalaya High Court ka la shong bishar ha ka Lah Sngi U Blei ha kaba ïadei bad ka mukotduma ba la ai da ka Synjuk pyrshah ïa ka JMB halor ka jinglum ïa ki ñiut ki ñier na Jowai.
Ha kane ka sngi, u General Secretary ka Synjuk u la ai da ka jingthoh ha kaba u la kam ba kam shym la don kano-kano ka jinglum ñiut da ka JMB. Katkum ka kaiphod ba la ai da u General Secretary, la pynpaw ba ki don ki jaka ha kaba ka jinglum ñiut ka long tang shisien lane arsien ha ka shi bnai bad don ki jaka ba kam don satia ka jinglum ñiut. Ha kajuh ka por la kdew ba watla ka jinglong jingman ha u bnai Lber 2023 ka la kham biang, hynrei ha u bnai Ïaïong 2023, ki don ki jaka ba ki trok kit ñiut ki khlem leit shuh satia.
Hynrei, na ka liang ka sorkar bad ka JMB ki la pynpaw ba kam dei satia kumba la kam ha katei ka kaiphod jong ka Synjuk. Ki la pyntip ba la thaw da kawei ka kynhun ha rynsan WhatsApp (WhatsApp Group) ha kaba ki Rangbah Shnong jong ki dong bapher bapher ki ïadon bynta lang ha kane ka kynhun nalor ki nongtrei jong ka JMB khnang ba lada don ka jingbym ïaid beit ka jinglum ñiut, mano-mano ki lah ban ujor.
Ka JMB ka la ong ba kam shym la ïoh pdiang satia ïa kano-kano ka jingujor halor ka jingbym lah ban lum ñiut katkum ki sngi bad por ba la pynbeit ryntih naduh ka 17 tarik Lber, 2023.
Na ka liang ka JMB ka la ong ba ka la khot da ka jingïalang bad ki Rangbah Shnong khnang ban ïakren bha halor ka jinglum ïa ka ñiut ka ñier na Jowai, hynrei ha kata ka jingïalang, tang arngut ki Rangbah Shnong ki la wan ban ïashim bynta.
Kumta na ka liang ka High Court ka la bthah ïa ka sorkar ba kan pynlong da ka jingïalang hapdeng ka JMB bad ki Rangbah Shnong ka Jowai. Ka sorkar, lyngba ka shlem treikam jong u Deputy Commissioner, ka dei ban pyntikna ba ka JMB kan bud ïa ki sngi bad por ba la buh na ka bynta ban lum ïa ki ñiut ki ñier kumba la pynpaw ha ka byrta ba la pynmih ha ka 17 tarik Lber, 2023.
Nangta la bthah ruh ba u ophisar ba hapoh jong u DC u lah ban pynlong ïa ka jurip ba kyndit-kynsan sha ki shnong ki thaw bad ban ai ïa ka kaiphod sha u DC halor ka jingshem jong u khnang ba u DC un lah ban ai ïa ka jingthoh sha ka High Court.
Shuh shuh la bthah ïa ka JMB ba kan pynbeit noh ïa ka tarik jong ka jingïalang bad ki Rangbah Shnong bad ban ïa pynbeit ïa ki jingeh bad ki jingduna.
